Almatydaǵy ishinde meıramhanasy bar, túngi klýby bar, qysqasy toı-dýmannyń neshe túrin ótkizýmen aınalysatyn oıyn-saýyq ortalyǵynyń birinde admınıstrator bolyp jumys isteıtin A. esimdi kelinshek bul mekemeniń ishki tirligi týraly aıtyp berdi.
Oıyn-saýyq ortalyǵynyń túngi klýbynda segiz jyldan beri jumys isteıtin A. «Kúndiz teledıdar arqyly minbeden sóılep turǵan ákesin kórsek, túnde klýbtan ul-qyzdaryn kezdestiremiz. Tipti túngi klýbqa kelgenderdiń qaısysy kimniń qyzy ekenin tanyp, bilip alǵanbyz» deıdi.
«Árıne, jastardyń demalysyn oıyn-saýyq ortalyǵynda ótkizýine eshkim qarsy emes qoı. Degenmen, bizdiń klýb negizinen jezóksheler shoǵyrlanatyn jer bolǵandyqtan «deni saý» qyz kelmeıtini anyq. Turaqty klıent jigitterdiń «Men ana qyzben boldym, anaýsymen de boldym, mynaýmen birneshe ret» dep saýsaqpen kórsetip, ashyq aıtyp, maqtanatyny bar.
Keıbir ataqty adamdardyń ul-qyzdarynyń osyndaı oryndarda júretini túngi klýb qyzmetkerleri biz úshin de tań qalysty, árıne. Qaısysy kimniń uly ıa qyzy ekenin júzderinen tanyp, aty-jónin bilip alǵanbyz. Bizge ár túni keletinder negizinen elıtalyq jezóksheler. Óıtkeni qarapaıym otbasynyń ul-qyzdary bizdiń klýbtyń esiginen de syǵalaı almasy anyq. Bundaǵy menúdiń ózi tek qaltaly kisilerge arnalǵan».
A.-nyń sózinshe, elıtalyq jezóksheler kóp jınalatyn klýb iri oıyn-saýyq ortalyǵyna tıesili bolǵandyqtan, meıramhanasynda besik toı, tusaýkeser, shildehana, týǵan kún jáne úlken kisilerdiń mereıtoılary da ótkiziletinin aıtty.
«Bizdiń jumysymyz óte mazasyz. Demalýǵa ýaqytymyz joq. Kúndiz qazaqı toılar ótkizsek, túnde jastarǵa arnalǵan elıtaly jezókshelerdi qamtıtyn oıyn-saýyq jıyndar ótedi. Kúndiz besik toıǵa arnalǵan bólmege túnde jezóksheler jınalady. Bári bar bul jerde. Jatyn oryn, kóńil kóteretin, bıleıtin zal, t.b. túgel oılastyrylǵan.
Alǵash osy klýbqa jumysqa ornalasqanda móldiregen súıkimdi qyzdardy kórgende «obal-aı» deıtinmin. Birde klıent jigitterdiń birimen sóılesip turǵanmyn. Ádemi, fıgýrasy kóz tartarlyq jas qyz kirdi. «Túngi klýbqa alǵash ret kelip tur-aý, on ekide gúli ashylmaǵan, buzylmaǵan qyz ǵoı» dep edim, álgi jigit myrs etti. «Men bul qyzdy birneshe ret paıdalanǵam» degen kezde tań qaldym. Syrttaı ıbaly, taza sıaqty kóringenmen, jaman júristi ekenin jurttan qalaı jasyrady eken dep oıladym.
Túngi klýbtyń talaı syryn jaıyp salǵan A. elıtaly jezókshelerdiń arasynda qazaq qyzdarynyń óte kóp bolýy ókinishti ekenin de jasyrmady.
Jazyp alǵan Aıǵanym Birtýar
