Qazaqstandyqtardyń kóp bóligin (86%) Reseı men Ýkraına arasyndaǵy qaqtyǵystyń órshýi alańdatady. Saýalnamaǵa qatysqan azamattardyń 56%-y osy taqyryptaǵy jańalyqtar legin turaqty baqylap otyrady. Al, qazaqstandyqtardyń 14%-n bul jaǵdaı qyzyqtyrmaıdy. Olardyń 10%-y Ýkraınadaǵy jaǵdaıdy tanystarynyń áńgimesinen estigen. Saýalnamaǵa qatysqandardyń 4%-y kórshi eldegi saıası ahýalǵa beı-jaı qaraıdy eken. Respondentterdiń 11%-y Qyrymnyń Reseıge qosylýyn Ýkraına turaqtyǵyn zańsyz buzý dep esepteıdi. Al, 61%-y Qyrym buryndary Reseıge tıesili bolǵan, sol sebepti Reseıge qosylýyn qoldaımyn dep jaýap berdi. Al, saýalnamaǵa qatysqan qazaqstandyqtardyń 22%-y bul másele boıynsha beıtarap pikir ustanady. Alaıda, burynnan beri dostyq qarym-qatynasta bolǵan eki el arasyndaǵy daý-damaı olardy alańdatady. Al, suraqqa jaýap bergen azamattardyń 5%-n bul suraq múlde qyzyqtyrmaıdy eken. Sondaı-aq, saýalnama nátıjesi Reseıdiń aqparat quraldarynyń qazaqstandyqtardyń kózqarasyna yqpalyn kórsetti. Respondentterdiń 30%-y Ýkraınadaǵy jaǵdaı jaıly aqparatty reseılik BAQ-n alady. Al, aqparatty qazaqstandyq BAQ quraldarynan alatyn respondentter sany da osy shamalas, 28%. Ýkraınalyq aqparat quraldarynan jańalyqtardy oqıtyn (kóretin) azamattar tek 0,69%. Batys elderiniń jańalyqtaryn 1,21%-y ǵana kóredi. Al, 36% saýalnamaǵa qatysqan qazaqstandyqtar múmkindiginshe, barlyq elderdiń aqparat quraldaryn baqylap otyrýǵa tyrysady eken. (Onlaın saýalnama nátıjesi boıynsha bul jaýap 71%). Suraqtarǵa jaýap bergen turǵyndardyń 73%-y Reseı quramyna qosylǵan soń, Qyrym halqynyń bolashaǵy jaqsarady, sebebi olar yqpaldy memleketten qoldaý tabady deıdi. Al, 5%-y kerisinshe, olar Ýkraına quramynda bolǵanda, Eýropamen yqpaldasýǵa múmkindik bolatyn edi degen jaýapty tańdady. (Onlaın saýalnama nátıjesi boıynsha bul jaýap 27%). Reseı men quramynda orys halqy bar kórshi ózge memleketter arasynda osyǵan uqsas aýmaqtyq janjaldar bolýy múmkin be degen suraqqa, respondentterdiń
38%-y bolýy múmkin dep jaýap berdi. Bolýy múmkin emes degen jaýapty tańdaǵan respondentter sany da dál osyndaı, 38%-dy kórsetti. Olardyń tórtten bir bóligi, ıaǵnı 23% -y jaýap berýge qınalamyn degen jaýapty tańdady.
