Atyshýly Borattyń daqpyrty talaı jyldan beri biter emes. Jaryqqa shyqqaly qazaq ultyn qaralap, álemniń "mazaǵyna" aınaldyrǵan osy fılmniń umytylmaýyn kúıttep, "nasıhatynyń" kórigin basyp otyrǵan basqa emes, óz elimiz eken. Muny AQSH-tyń ózi kelemejdep, synǵa alýda.
Osydan birer apta buryn, Vashıngton qalalyq gazetiniń saıtynda “Billy Se*crime,” Borat Character, Appears in Kazakhstan Embassy Promotional Book» atty maqala jaryq kórdi. Munda “Around the World Embassy Tour» dep atalatyn álemniń 50 - den astam elshilik qatysqan AQSH kórmesinde Qazaqstan elshiligi márttik jasap, ár túrli buıymdar: sómkeler men kúntizbeler, álemdegi jer kólemi boıynsha toǵyzynshy oryn alatyn memlekettiń jol silteýshi kitapshalaryn taratqanyn málimdedi. Jáne bul kitapshalardyń birinde áıgili Borat sekildi keıipker "Bıllı Se*crime" týraly Qazaqstan elshiligi jazǵanyn tańdanyspen habarlaıdy. Kitapshalardyń mýzykalyq bóliminde qazaqstandyq estrada ókilderi men qosa "Bıllı Se*crime" esimdi ánshiniń aty atalǵan. Bul "Borat" fılmindegi oıdan shyǵarylǵan, aty bar, zaty joq keıipker. Eshkim eshqashan kórmegen, fılmde joq. Biraq, Borattyń rólin oınaǵan Sasha Baron Koen 2006 jyly Entertainment Weekly -ge bergen suhbatynda ǵana aıtqan. Borat tıptes keıipkerdiń elshiliktiń basylymyna qalaı engizilgeni túsiniksiz. Elshiliktiń qatesi me, qaljyńy ma belgisiz. Al, QR elshiligi pikir bildirýden bas tartqan. Basylym «Borat máselesiniń» Qazaqstanǵa resmı túrde kedergi keltirýi birinshi ret emes dep baǵa beredi: «It’s not the first time the Central Asian nation has been subjected to Borat-related spoofing in official settings. There was the time when, during the medals ceremony of an international shooting competition in Kuwait». Iaǵnı, byltyrǵy Kýveıttegi Qazaqstan Gımniniń ornyna Borattyń ásire uıatsyz óleńiniń oınatylǵanyn synǵa alady.
Sonymen qatar, álgi "gımndegi" «Qazaqstan tek qana ádepsiz dástúrlerge ǵana emes, kalııge baı el» degen óleń joldaryna maǵynalas mátinder joǵaryda aıtylǵan jolsilteýshide de kórsetilgen. Sáıkestik pe, kim bilsin?
Halqymyzda "Ózińdi jattaı syılaı bil, jat janyńnan túńilsin" degen tamasha máteli bar. Óz halqyn ózgeniń mazaǵyna jyǵyp bergen bizdiń elshilikke ne deýge bolady?
Janıa Ábdibek
