Qazaqstan prezıdentiń resmı saıty http://www.akorda.kz/ -ti ne jazyldy eken dep kún qurǵatpaı ashyp turamyn. Qashanda reseıdiń memlekettik tilimen ashylady. Árıne qazaq tilindegi beti bar, biraq jaryq etip shyǵa kelgennen soń amalsyz orys tilindegi aqparatqa kóz júgirtesiń. Sosyn qazaq tiline aýystyra qalsań jańa ǵana oqyǵan aqparatyń joq, eski aqparattar turady. Bul jáıtti bir Aqorda saıty emes, resmı bıliktiń bir qatar saıttarynan baıqadym.

Olar:

http://www.constcouncil.kz/ - Qazaqstan Respýblıkasynyń konstıtýsıalyq keńesi saıty;

http://www.mint.gov.kz/ - Indýstrıa jáne Jańa tehnologıalar mınıstrligi saıty;

http://www.edu.gov.kz/ - Bilim jáne Ǵylym mınıstrligi saıty;

http://www.eco.gov.kz/new2012/ - Qorshaǵan ortany qorǵaý jáne Sý resýrstary mınıstrligi saıty.

Sondaı-aq aq bir qatar saıttar qazaq tilinde ashylǵanymen tóbesindegi ataýy orys tilinde jazylyp turady. Bulardyń janynda premer-mınıstr Kárim Másimovtyń resmı saıty qazaq tilinde ashylady.

 Prezıdent Nazarbaevtyń Qazaqstan halyqtary assambleıasynyń 20 sesıasynda «Búginde ultty biriktirýshi basty faktor qazaq tili – memlekettik til bolyp otyr», - degen sózi bar edi. Prezıdent ylǵı da jınalystarda «Qazaq tilin» buqaralyq qoldanysqa engizý jaıyn aıtyp júredi. Degenmen Elbasy ne dedi eken dep eleńdep qaraıtyn saıtyn basa qalsańyz orys tilinde ashylatyny kóńil qynjyltady. Ádette kez kelgen memlekettik mekemege qońyraý shala qalsańyz, hatshy qyzdyń orys tilinde jaýaptasatyny tańqalarlyq jaǵdaı emes. Joǵarǵy deńgeıdegi jıyndardyń derligi de memlekettik tildi «mazalap» jatpaıdy. Memlekettegi 67%  halyqtyń tili qashanǵy aıaqqa taptala bermek?

Nurǵalı Nurtaı