Almaty oblysynyń ákimi Amandyq Batalov Qaratal ózeniniń arnalaryn baqylaý úshin tikushaqpen aralap kórdi. Jańa drenajdyq kanaldyń qurylysy aýmaǵynda bolyp, ózenniń Balqash kóline quıatyn arnalaryn tazartýdyń gıdrotehnıkalyq sharalarynyń júrgizilý barysy týraly mamandarmen áńgimelesti.
Balqashqa quıatyn arnasyn qalpyna keltirý jumystary oblys ákiminiń bastamasymen osydan eki jyl buryn bastalǵan bolatyn. Ol kezde másele ǵalamdyq deńgeıge kóterilý qaýpiniń aldynda turǵan edi. Kóktem kezindegi sýdyń molaıýynyń saldarynan qalyptasqan bóget ózen arnasynyń kózin múlde jaýyp tastaıtyn. Sý ózenge jetpeı jaıylyp, aýyl sharýashylyǵy jerlerin sazǵa aınaldyratyn. Bul jaǵdaıdyń saldarynan jaqyn mańdaǵy aýyldarǵa birneshe márte sý jaıylý qaýpi de týdy. Oǵan qosa balyq aýlaý salasyna da zıanyn tıgizdi. Qamystyń túbinde ólgen balyqtar jatatyn. Jergilikti sharýashylyqtar burynǵydaı balyq aýlaýdan qalǵan-tyn. Al Balqash kóliniń ózi kún sanap qurǵap bara jatty. Jaǵdaı jedel sharalardy qolǵa alýdy qajet etti. Sondyqtan oblys basshysynyń tapsyrmasyna sáıkes eń aldymen «Qaratal» melıoratıvti otrády qurylyp, arnaıy tehnıkamen jaraqtandyryldy. Osy sharalar úshin oblystyq búdjetten 200 mln. teńgeden astam qarjy bólindi.
«Qaratal» MO dırektory Baqbergen Madıbekovtiń habarlaýynsha, 4 aıdan astam ýaqyttyń ishinde mamandar uzyndyǵy úsh júz metr bolatyn bógetti joıyp, eni 20 metrlik 13 shaqyrym kanaldy qum men batpaq ishinen arshyp, qazyp shyqty. 10 myń gektarlyq jaıylymdyq jer qurǵatylyp, aınalymǵa engizildi.
Osyndaı jumystardyń nátıjesinde sýy mol ózen kólge baryp quıatyn boldy, sondaı-aq balyq sharýashylyǵy qaıta jandandy. Balqash kóline aqbalyq qaıta oraldy. Al Qaratalda qazir bekire balyǵyn aýlaıdy. Mamandar muny Balqashtyń qutqarylýy dep atady.
Búgingi kúni «Qaratal» mamandandyrylǵan otrádynyń qyzmetkerleri uzyndyǵy 6,5 metr bolatyn ekinshi drenajdyq kanaldy qazý ústinde. Bul jumysqa jańa joǵary tehnologıaly tehnıka tartylǵan. «Voter master» dep atalatyn bul tehnıka 5 operasıany bir mezgilde oryndap, tutas bir avtoparktiń kúshin almastyra alady. Júzetin mashına bes metr tereńdikte jumys isteı alady, bógetterdi alyp tastaıdy, kanal túbin tereńdetedi, arnany keńeıtedi, tipti dińgek te qaǵa alady.
Mamandardyń aıtýynsha, qabyldanǵan sharalar Balqash kóliniń taǵdyryna oń áser etti. Endi kóldiń saıazdaný qaýpi seıildi. Biraq Balqashty jáne tutas ekojúıeni qutqarý jumystary jalǵasa bermek.
- Eki kanal jasap, dambanyń qurylysyn júrgizý atqarylatyn jumystyń kishkentaı bólshegi ǵana. Bul bir kúndik jumys emes. Arnany tazalaý júıeli sıpat alyp, ony turaqty túrde júrgizýimiz kerek. Jańa sý sharýashylyǵy baǵdarlamasy da qabyldanatyn bolady. Jetisýdyń ózenderi bul baǵdarlamanyń negizgi nysany bolmaq. Atalǵan jumysqa qazirden kirisýimiz kerek, - dedi oblys ákimi Amandyq Batalov qorytyndy sózinde.
Almaty oblysy ákimdiginiń resmı saıty
