Almaty oblysynda bıyl 12-shi ret ótkizilip otyrǵan aýdandar men qalalardyń mádenıet kúnderi óz máresine jaqyndady. İle aýdanynyń ónerpazdary usynǵan dýmandy shara Chapaı aýylynyń Mádenıet úıinde ótkizildi.
Aldymen eńseli Mádenıet úıiniń aldyndaǵy alańnyn saltanatqa saı bezendirilýi eriksiz nazar aýdartady. Eki qaptalynda ornalasqan qolóner men ekonomıka salasynda qol jetken tabystarǵa arnalǵan kórme kórkemdigimen kóz tartady. Aýdandyq aýylsharýashylyǵy basqarmasynyń menshigindegi shatyrdyń astynda yntymaǵy sútteı uıyp, berekesi artqan, eline yrys pen baqyt qonyp, jerine baılyq tunǵan, tamyry tereń, ómiri óleń, qoınaýy qutty, qyzyrly İle óńirinde óndirilgen azyq-túlik taýarlary tizilipti. Munda búginderi shetel naryǵyn ıgere bastaǵan «Dáýlet – Beket» túıe sharýashylyǵynda jasalatyn shubat sýsynynan bastap, kókónis jáne baqsha ónimderi, tipti qutty qonaqqa arnaǵan qazy-qarta, jal-jaıa da kóptep óndiriledi.
Ozyq tehnologıa negizinde qurylysqa qajetti ónimder shyǵaratyn «BTK GROUP» zaýytynyń, jeńil ónerkásip salasynda Qazaqstan naryǵynda ózindik orny bar «Medıateks – N» baskıimder tigetin kompanıasynyń, dárilik preparattar shyǵaratyn «Leovıt» seriktestiginiń, mal azyǵyna qosatyn dárýmender óndirýmen aınalysatyn «Kormovık» zaýytynyń taýarlary jalpy jurtshylyqtyń qyzyǵýshylyǵyn týdyrýda. Al ekinshi jaǵynda orys, káris jáne túrik etnomádenı birlestikteriniń ulttyq salt-dástúrlerin baıandaıtyn jáne qazaq halqynyń qolóner buıymdary qoıylǵan kórmeler ornalasypty. Jergilikti sýretshi Ermek Jumahanovtyń tabıǵatty beıneleıtin tamasha týyndylary da eriksiz nazar aýdartady. Aýdan ákimi Qydyrgeldi Medeýov bastaǵan saltanatty shara qonaqtary aldymen osy kórmelerdi aralap, aýdan turǵyndarynyń jetistikterine oń baǵasyn berdi.
Osydan keıin merekege kelgen qonaqtar qyzyl kilemmen kómkerilgen alańda «Birlik bolsyn elimde!» taqyrybynda ázirlengen fleshmobty tamashalady. Aldymen jurt aldyna shyqqan ánshiler halqymyzdyń ejelgi dástúri boıynsha jyr-arnaý oryndasa, júz dombyrashy júreleı otyra qalyp quıqyljytqan Ábdimomyn Jeldibaevtyń «Erke sylqym» kúıi tóbe quıqamyzdy shymyrlatyp, delebemizdi qozdyrdy. Al İle aýdanynda turatyn barlyq etnostardyń ulttyq kıimderin kıgen bıshiler el birligin aıshyqtady.
Qonaqtar Mádenıet úıinde el táýelsizdiginiń 25 jyldyǵyna baılanysty aýdandyq kitaphana ujymynyń qyzmetkerleri uıymastyrǵan kórmeni aralady. Osydan keıin mádenıet shańyraǵynyń jıynjaıynda aýdan ákimi óńirdegi zıaly qaýymnyń ókilderimen júzdesti. Bul basqosýda Qydyrgeldi Ómirjanuly jınalǵandarǵa qasıetti İle óńirindegi ekonomıkalyq, áleýmettik, mádenı salada qol jetken tabystarǵa keńinen toqtalyp ótti. Oblystyń qorjynyna túsetin salyq mólsheriniń úshten birin quraıtyn irgeli aýdannyń bul baǵytta aýyz toltyryp aıtatyn jetistikteri az emes. Kezdesý barysynda aýdannyń Qurmetti azamattary Kenshın Qasymbekov aqsaqal men aqyn Shynádil Muqanov, aýdandyq qoǵamdyq keńestiń múshesi, «Elegıa» ansambliniń kórkemdik jetekshisi Anastasıa Melnık sóz alyp, ata-babalarymyz armandaǵan táýelsizdik jyldaryndaǵy jeńisterimiz jaıly óz oılaryn ortaǵa saldy.
Mádenıet kúnderin ónerpazdardyń qatysýynsyz kózge elestetý múmkin emes. Bul joly óner sheberleriniń konserti Mádenıet úıiniń kórermender zalynda ótti. Sahna shymyldyǵy Aqshı halyq teatry, «Abra», «Naz», «Kerim-aı» bı toptarynyń qatysýymen qoıylǵan «Ult ordasy – Ulytaý» teatrlandyrylǵan kórinisimen ashylsa, A. Melnık jetekshilik etetin «Elegıa» vokaldy ansambliniń oryndaýyndaǵy Sh. Sarıev pen V. Pıtersevtiń «Táýelsiz Qazaqstan» áni konserttiń shyraıyn keltire túsken. Á. Nurǵoja atyndaǵy ardagerler jáne «Aqnıet» ájeler ansambli shyrqaǵan «Ardagerler marshy», «Sarmat» bı toby oryndaǵan «Bı álemi» kompozısıasy, aýdannyń mádenıet qyzmetkrleriniń «Aspaptar sherýi», «Abra» bı toby usynǵan «Ómir boıaýlary» bıi, Kadetter hory, «Elegıa» vokaldy toby jáne ustazdar men oqýshylar birlese shyrqaǵan G. Qubasheva men J. Ramazannyń «Táýelsiz elim» áni de jurtshylyqtyń ystyq yqylasyn alyp, qyzý qoshemetke bólendi.
Qýat Qaıranbaev, «Jetisý» gazeti
