Sybaılas jemqorlyqqa qarsy is-qımyl ulttyq búrosynyń baspasóz qyzmeti "Fenıks" kórkemfılminiń túsirilimderine bólingen qarajattyń jymqyrylǵanyn anyqtady, - dep habarlady.

Tergeýdiń málimetinshe, "Qazaqfılm" AQ-nyń "T.K.TURAN UNIVERSAL BUSINESS" JSHS-ǵa fılmniń óndirisine 79 mıllıon teńge bólgeni anyqtalǵan. "Onyń 69 mıllıon teńgesin kartına prodúseri Tuńǵyshbaı Jamanqulov jymqyrǵan. Ol - "T.K.TURAN UNIVERSAL BUSINESS" JSHS-nyń quryltaıshysy", - delingen habarlamada. Osyǵan baılanysty Tuńǵyshbaı Jamanqulovtyń búgin, 2 qarashada ustalǵany belgili boldy.

Sondaı-aq, qarajattyń qosalqy merdigerlik uıymdarda qolma-qol aqshaǵa aınaldyrylyp, Tuńǵyshbaı Jamanqulovqa berilgeni aıtylady.

Sonymen qatar, qarajat jymqyrýǵa "Qazaqfılm" AQ-nyń ekonomıka jáne qarjy jónindegi basqarýshy dırektory G.Ysqaqovanyń jáne fılmniń atqarýshy prodúseri N.Iýdınanyń qatysy bar ekeni dáleldengeni habarlanyp otyr. Aıta keteıik, olar sottyń sanksıasymen qamaýǵa alynǵan bolatyn.

Eske sala ketetin bolsaq, jaqynda ǵana Tuńǵyshbaı Jamanqulov Mádenıet jáne Sport mınıstrin synaǵan edi.