Shahar basshysy Baýyrjan Baıbek Almatyda ótken TMD Salyq qyzmetteriniń forýmyna qatysty

TMD memleketteri Salyq qyz­meti basshylary úılestirý keńesiniń HHİİİ otyrysy Almatyda ótti. Keńes otyrysyna qatysqan Almaty qalasynyń ákimi Baýyrjan Baıbek Qazaqstannyń qarjy jáne bıznes ortalyǵy – Almatyda salyq qyz­metiniń mańyzy men atqarar róli erekshe ekenin aıtty.

– Almaty – memleket kirisiniń úshten birin beretin donor-qala. Memleket basshysynyń aıqyndap bergen baǵdarla­malary men megapolıstegi joǵary deńgeıdegi bıznes-ahýaldyń arqasynda almatylyqtar tabys tabýda. Biz Almatyny kásipkerlik pen jeke kapıtaldyń qalasy dep aıtamyz. Táýelsizdiktiń 25 jyldyq ýaqytynda Qazaqstan ekonomıkasy 20 ese ósse, Almatynyń jalpy aımaqtyq ónimi (JAÓ) 100 ese bolypty. Almaty turǵyn­darynyń kirisi jalpy elmen salys­tyrǵanda 2,2 ese kóp. Búginde Almatynyń «Jalpy aımaqtyq ónimi» 41 mlrd. AQSH dollary. Bul keń kólemde salystyrǵanda jaman kórsetkish emes, – dedi Almaty qalasynyń ákimi.

Shahar basshysy jeti basym baǵytqa negizdelgen «Almaty-2020» baǵdarlamasy týraly da jan-jaqty aıtyp berdi. B.Baıbek salyq qyzmeti baǵdarlamadaǵy basty baǵyttardyń biri – «Turǵyndarǵa jaıly qala» tuǵyrnamasynyń damýyna tikeleı qatysty ekenine toqtaldy. Baǵdar­lamanyń osy baǵyty qala ekonomıkasyna sheteldik ınvestorlar men qosymsha ınvestısıalar tartýǵa múmkindik beredi.

– Biz byltyr 4,2 paıyz ekonomıkalyq ósimge qol jetkizdik, bıyl da jaqsy kór­setkishter kútýdemiz. Jalpy, 2016 jyldyń 9 aıynda búdjet shamamen 80 paıyzǵa oryndaldy. Shaǵyn jáne orta bıznesten (SHOB) jınalǵan salyq túsimi 40 paıyzdan asty, kezinde 10 paıyzdan bastaǵan bolatynbyz, – dedi B.Baıbek.

Táýelsizdik tusyndaǵy sońǵy 15 jylda el búdjetine salyq jáne basqa da mindetti tólemderdi jınaý 9 ese artqan. Bul kór­setkish 2000 jyly 393 mlrd. teńge bolsa, 2015 jyly 5,1 trln. teńgege jetti. Osy turǵydan kelgende, eldegi, megapo­lıstegi búdjettik tabystyń negizi – salyqtyq túsim. Al búdjetti qalyptas­tyratyn qarjy bolsa, eldegi jasalyp jatqan barlyq baǵdarlamalardyń kúre­tamyry.

Almatyda ótken TMD memleketteri salyq qyzmeti basshylary forýmynda Dostastyq elderiniń qarjy-ekonomıkalyq saladaǵy ózara baılanys, is-qımyldary talqylandy. Forýmdaǵy basty taqyryp­tardyń biri – salyq qyzmetinde shot-faktýralardyń, taýarlardyń qozǵalysyna arnalǵan qujattardyń (nakladnoı) elektrondy júıesin engizý tájirıbesi boldy. TMD elderi boıynsha kedendik, salyqtyq qyzmetterdiń memleketaralyq ózara baılanysy sóz boldy.

Nurlan SÚIİN

«Almaty aqshamy»