Biz jýyrda  Jer jáne qury­lys jónindegi máslıhat janyndaǵy komısıa múshelerimen birigip, Jer máselesi týraly jıyn ótkizip, halyq pikirin tyńdadyq. Onda qala turǵyndary qala syrtynda ıgerilmeı jatqan jer telimderi bolsa, ony turǵyn úı salýǵa, bolmasa, sharýashy­lyq júrgizip, jeke kásip ashý ıgiligine berse degen usynystaryn bildirdi. Turǵyndardyń bul pikirlerin jınaqtap, biz Jer máselesi jóninde qurylǵan komısıaǵa usynbaqpyz. Al endi ózim saılanǵan Alataý aýdanyndaǵy saılaý ýchaskesiniń saılaýshylar  tarapynan berilgen   tapsyrmalarymnyń birqataryn oryndadym desem de bolady. «Alǵabas» yqshamaýdany turǵyndary júrginshi joldaryn salý jóninde usynys aıtqan edi, ol másele sheshimin tapty. Al osy yqshamaýdan turǵyn­darynyń  «Aqsaı» kóshesin asfált­tap berý týraly másele kótergen­derine biraz ýaqyt bolsa kerek. Jaqynda ol másele de demeýshileri­mizdiń arqasynda sheshimin tapty. Biz qalanyń qurylysyna kóriktendirý men kógaldandyrý jumystaryn jyl basynda qabyldanǵan Almaty qalasyn damytýǵa baǵyttalǵan «Almaty-2020» baǵdarlamasy aıasynda júzege asyryp kelemiz. Memlekettik-jekemenshik seriktestik jobasy aıasynda «Boraldaı» yqshamaýda­nynda balalarǵa arnalǵan  sport-oıyn alańyn saldyq. Halyq senimin artyp, qolymyzǵa depýtattyq mandatymyzdy alyp júrgendikten, saılaýshylar tarapynan aıtylǵan qandaı da bir ótinim, tilek bolsyn sergektikpen qaraýǵa tyrysamyn. Alataý aýdany boıynsha ótkizilgen «Mektepke jol» qaıyrymdylyq aksıasyna atsalysyp, kópbalaly otbasylary men turmysy tómen otbasylarynda tárbıelenip jatqan balalardyń qatarynan qalmaı, mektepke barýyna jaǵdaı jasadyq. Sonymen qatar,  aýyr naýqasqa shaldyqqan bir sábıdiń emdelýine kómek qolyn sozdyq. Adamǵa kómek qolyn sozý depýtattyq qana mindetim emes, ózimniń azamattyq, analyq paryzdarymnyń biri dep sanaımyn. Qolyńnan kelse, adamdarǵa qolushyn bergenge ne jetsin. Osy rette men  áleýmettik jobalarǵa grant bólgen kezde  sol qoǵamdyq uıymdardyń  qolǵa alǵaly otyrǵan jumystarynyń jospary, baǵyt-baǵdarymen tanysyp, olardyń osy uıym arqyly adamdarǵa qandaı kómek kórsete alady, sony baǵamdap baryp grant bólsek dep oılaımyn. Bolmasa, bizde áleýmettik jobalalarǵa beriletin granttardy  jyl saıyn utyp alǵanmen, ol qara­jatty halyq ıgiligine jumsaıtyndary neken-saıaq. Sodan keıingi qala turǵyny retindegi taǵy bir usynysym – ortalyq kóshelerdegi tamaq, kıim, qymbat uıaly telefondar týraly jarnamalardy azaıtsaq. Jarnamanyń  qala búdjetine qomaqty qarjy ákeletindigin jaqsy túsinemin, biraq, bizge dál qazir  jastardy dúnıe­qumarlyqqa tárbıeleıtin ondaı súreńsiz jarnamalardan góri, rýhanı  dem beretin, jastardyń solarǵa elikteýine yqpal etetin  belgili sportshylarymyzdyń, ǵalymdary­myzdyń, densaýlyq saqtaý, ádebıet pen óner salasynyń kórnekti ókilderiniń, Almaty qalasynyń qurmetti azamattarynyń sýretteri ilinýli tursa, Almaty qalasynyń kósheleri ajarlana túser edi. Qazir kóshe boılaryna danalyq sózderdi jazyp ilip qoıypty.  Orysshadan qazaqsha aýdarylsa kerek, keıbir sózderi orasholaqtaý kóringenmen, oqyǵan adamyn oılandyrady. Bul degenińiz qala basshylyǵynyń kóshe tárbıesine kóńil bóle bastaǵanynyń belgisi. Bala turmaq, úlken adamnyń ózin qorshaǵan ortasy men kóshe tárbıeleıtinin eskersek, mundaı  sanaǵa sáýle túsiretin kórikti oılardyń qala aýdandarynyń kóshelerinde de bolǵany abzal. «Almaty-2020» baǵdarlamasynyń eń basty maqsaty – qalany turǵyndarǵa jaıly qala jasaý bolyp otyrǵan­dyqtan, biz  barynsha osy máselege jan-jaqty kóńil bólýimiz kerek. Men jaqynda depýtattyq jumysyma baılanysty Alataý aýdanyndaǵy AZTM dep atalyp ketken yqsham­aýdan turǵyndarymen kezdestim.  Onda turyp jatqan 60 otbasynyń áli kúnge deıin turaqty baspanalary men tirkeýleri joq eken.  Qazir sheshimi tabylmaı kele jatqanyna jıyrma jylǵa jýyqtap qalǵan osy AZTM yqshamaýdany turǵyndarynyń máse­lesin sheshý joldaryn qarastyryp  jatyrmyz. «Almaty – 2020»  damý baǵdarlama­synyń talaptaryn eskere otyryp, osy aımaqtan shaǵyn turǵyn úı keshenin salý oıymyzda bar. Almaty qalasyna qosylǵan eldi mekenderdiń  máselesi áli shashetek­ten, degenmen, kúrmelip qalǵan máselelerdiń túıinin bir jylda sheship tastaý múmkin emes, degenmen, qala basshysynyń qazirgi ustanyp otyrǵan  Almaty qalasyn damytý baǵytyndaǵy kóregen saıasaty bul máselelerdiń jaqyn ýaqyttarda oń sheshimin tabýyna múmkindik beredi degen senimdemin. Eń bastysy,  ustanyp otyrǵan baǵytymyz durys. Sol baǵytta bir jaǵadan bas, bir jeńnen qol shyǵara eńbek etsek, alǵa qoıǵan maqsattarymyzǵa qol jetkizemiz. Al oǵan «Nur Otan» partıasynyń saılaýaldy tuǵyrna­malyq baǵdarlamasy negiz bolmaq.

Farıda MERHAMITQYZY

«Almaty aqshamy» gazeti