Teatr qaıratkeri, Qazaqstannyń Halyq ártisi Tuńǵyshbaı Jamanqulovtyń qazyna qarajatyn jymqyrdy degen aıyppen qamaýǵa alynýy qoǵamda qyzý talqyǵa tústi. Qamshy.kz T. Jamanqulovqa deıin de túrli aıyptarmen qamaýǵa alynyp, sotty bolǵan qazaqstandyq zıaly qaýym ókilderiniń birqataryn oqyrman nazaryna usynýdy jón kórdi.
Aron Atabek, aqyn, pýblısıs. Almaty qalasy «Shańyraq» yqsham aýdanynda 2006 jyly ótken narazylyq sharalary kezinde jappaı tártipsizdikter uıymdastyrdy, polısıany tutqynǵa alyp, óltirdi degen aıyppen 2008 jyly 5 qazanda 18 jylǵa bas bostandyǵynan aıryldy. Jaza merzimin sot 2006 jyldyń 17 shildesinen bastap esepteýdi belgiledi. A. Atabektiń jaza merzimi 2024 jyly 16 shildede aıaqtalady.
Jaqsylyq Dosqalıev, medısına ǵylymdarynyń doktory, profesor. 2010 jyly J. Dosqalıevtiń ústinen Densaýlyq saqtaý mınıstri qyzmetin atqarý kezinde laýazymdyq mindetterin asyra paıdalandy degen aıyppen qylmystyq is qozǵalyp, sot sheshimimen 2011 jyldyń 5 tamyzynda 7 jylǵa bas bostandyǵynan aıryldy. 2012 jyly Prezıdent Jarlyǵymen keshirim berilip, bostandyqqa shyqty.
Serik Saparǵalı, jazýshy. 2012 jyly sot úkimimen «Qazaqstan Respýblıkasynyń konstıtýsıalyq qurylymyn kúshtep qulatýǵa nemese ózgertýge ne onyń aýmaqtyq tutastyǵyn kúshpen buzýǵa shaqyrý» baby boıynsha kináli dep tanylyp, 4 jylǵa shartty túrde bas bostandyǵynan aıryldy.
Saıat Ybyraı, ǵalym, tehnıka ǵylymdarynyń doktory, profesor. 2012 jyly «Dinı arazdyq týǵyzdy», «Ekstremızm», «Qylmystyq top qurdy» degen aıyptarmen 12 jylǵa bas bostandyǵynan aıryldy.
Erlan Aryn, ǵalym, ekonomıka ǵylymdarynyń doktory, profesor. 2014 jyly Pavlodar oblysynyń ákimi laýazymyn atqarý kezinde laýazymdyq mindetterin asyra paıdalandy dep aıyptalyp, sot úkimimen 3 jylǵa shartty túrde bas bostandyǵynan aıryldy. Sondaı-aq, sot ony «Qurmet», «Parasat» ordenderinen aıyrdy.
Seıitqazy Mataev, jýrnalıs, Qazaqstan Jýrnalıser Odaǵynyń tóraǵasy. Jemqorlyqqa qarsy is-qımyl jónindegi Ulttyq búro ákeli-balaly Seıitqazy jáne Áset Mataevtardyń ústinen jemqorlyq faktileri boıynsha qylmystyq is qozǵady. 2016 jyly 3 qazanda Astana qalalyq Esil aýdanynyń 2№ soty S. Mataevty salyq tóleýden jaltardy, alaıaqtyq jasady dep taýyp, 6 jylǵa bas bostandyǵynan aıryldy. Al, S. Mataevtyń uly «QazTAG» Halyqaralyq aqparat agenttiginiń basshysy Áset Mataevty «Alaıaqtyq» baby boıynsha 6 jylǵa bas bostandyǵynan aıyrdy.
