Búgin Astana qalasynda máslıhat sheshimimen birqatar kóshelerdiń ataýy aýysqany, jańa kóshelerge at berilgeni belgili boldy. Máslıhat depýtattary Elordanyń negizgi dańǵyldarynyń biri Orynbor kóshesin «Máńgilik el» dep ataýdy uıǵarypty.
Ortalyqtan alastatylǵan Orynbor ataýy endi buǵan deıin shartty túrde E10 atalyp kelgen jańa kóshege berilmek eken.
Budan bólek Esildiń sol jaǵalaýynda endi Nıaz bı, Nurpeıis Baıǵanın, Sultanbek Qojanov, Qaıym Muhamedhanov, Nıkolaı Tesla, Rabıǵa Esimjanova, Sattar Erýbaev, Súıinbıke hanshaıym, Buqar jyraý esimderimen atalatyn jańa kósheler paıda bolmaq. Sondaı-aq, I. Panfılov kóshesine Sáken Júnisovtiń esimi berilip, B. Maılın kóshesi A193 kóshesimen qosylmaq. Al, burynǵy Hýseın ben Talal kóshesi Uly dala dańǵyly, Eńbekshiler kóshesi Álıhan dańǵyly atalmaq.
Bul onomastıkalyq sheshimderdi negizinen quptaýǵa bolady. Alash kósemi Álıhannyń atyn ulyqtaý, basqa da ult qaıratkerleriniń esimderin jaryqqa shyǵarý qoldaýǵa turarlyq bastama. Tek, kúmán týǵyzǵany Orynbor kóshesiniń ózgerýi bolyp otyr. «Máńgilik El» qaqpasy ornalasqany úshin ǵana kóshe ataýy ózgertilgen bolsa, onda ákimdiktegiler men máslıhat depýtattarynyń ońbaı qateleskeni. Orynbor ataýy, sondaı qalanyń, Orynbordaı astanamyzdyń bolǵanynyń ózi el tarıhynyń aınymas bóligi, keleshek urpaq úshin naǵyz máńgilik el muratynyń, baı tarıhymyzdyń bir belgisi emes pe? Astanaǵa deıin Almaty, Qyzylorda, Orynbor, Semeı qalalarynyń HH ǵasyrda Alash úkimetiniń, Keńestik Qazaqstannyń astanasy bolǵanyn eldiń bilgeni qylmys pa?
Joq álde, «Kezinde Qyrymǵa kýrortqa baratynbyz» dep Ýkraınanyń aralyn tartyp alǵan Reseıdiń álimjettik saıasatynan seskenip otyr ma bıliktegiler? Joq, Reseı bizdiń Orynbordan dámemiz bar dep seziktenip, sony ymdap jetkizdi me eken bizdiń basshylarǵa? Áıtpese, qanshama ýaqyttan beri kóz úırenip, qulaqqa sińisti bolyp qalǵan kóshe ataýyn ózge kóshelermen birge edel-jedel aýystyryp jibergeni qalaı? Nesi bolsa da, Saraıshyq, Syǵanaq syndy ejelgi astanalarymyzdyń atymen atalatyn kóshelerdiń bir aýmaqqa shoǵyrlanǵany áldebireýlerge unamaıtyn sekildi. Áıtpese, kóshe ataýy "Máńgilik el" saltanatty qaqpasynyń synyn ketirip tur degendi esh jerden estimep edik.
Jomart Abdollauly
