Túrkıa Respýblıkasy, Konıa qalasynda 31 mamyr- asharshylyq pen qýǵyn-súrgin qurbandaryn eske alý kúnine arnalǵan is-shara bolyp ótti.

   Eske alý keshi Konıa Qazaq jastary birlestiginiń uıymdastyrýymen jáne Konıa Túrik Oshaǵy jastar uıymynyń qoldaýymen júzege asty. İs-shara qýǵyn-súrgin qurbandarynyń rýhyna Quran baǵyshtaýmen bastaý alyp, XX ǵasyrdyń basynda Qazaq halqynyń basynan ótken uly náýbet týraly baıandamamen óz jalǵasyn tapty. Asharshylyqtyń sebepteri, saldary jáne qorytyndysy jaıly jınalǵan jurtqa málimet berildi. Qýǵyn-súrginge ushyraǵan, atý jazasyna kesilgen Alash arystarynyń qysqasha ómirbaıany kórsetilip, Alash urany oqyldy. Asharshylyq pen qýǵyn-súrgin qurbandaryn eske alý kúnine oraı Qazaq stýdentteriniń uıymdastyrýymen bolǵan bul shara Konıa qalasynda birinshi ret uıymdastyryldy. İs-sharanyń maqsaty alysta júrgen qandastarymyzǵa, Túrik halqyna Qazaq halqynyń tarıhyn, qýǵyn-súrgin qurbandaryn eske alý kúnin nasıhattaý. Baǵdarlama sońynda aǵaıyn Túrik eli orny tolmas qazaǵa kóńil aıtty jáne árqashan baýyrlas Qazaq halqynyń janynan tabylatyndaryn aıtyp, óz tilekterin bildirdi.

Aıgerim SARPEKOVA

Konıa qalasynan