Birneshe kún buryn Abai.kz saıty Qazaqstannyń syrtqy qaryzy 150 mıllıard dollarǵa jetkeni týary aqparat berdi.  Onda: «Qazaqstannyń syrtqy qaryzy – 150 mıllıard AQSH dollaryna jetti. Elimiz álemdik reıtıńte 148 memlekettiń ishinde 14-orynǵa ıe bolyp kelemiz», - degen QR premer-mınıstriniń orynbasary, qarjy mınıstri Baqyt Sultanovtyń Parlament palatalarynyń birlesken otyrysynda Májilis depýtaty Aıgúl Nurkınaǵa bergen jaýaby jazylǵan.

Bizge jetip jatqan keıbir aqparat kózderine qaraǵanda sońǵy jyldary Qazaqstanda qoldy bolyp, sheteldik ofshorlarǵa aýdarylǵan qarjynyń kólemi de týra osy 150 mlrd. AQSH dollaryn quraıdy eken. Sonda elimiz shetelderden alǵan qaryzdardyń 100 paıyzy qoldy boldy degen sóz.

Sońǵy kezderi elbasynyń sol qoldy bolǵan qarjyny zańdastyrýǵa kirisip ketýiniń ózin – amalsyzdan moıyndaý dep qabyldaýymyz kerek.

Alǵan qaryzy jaǵynan bizdiń elimiz álemdegi 148 eldiń ishinde 14-i orynda  turýynyń ózi – maqtanatyn kórsetkish emes.

Bizdiń bılik Qazaqstan halqynyń sany 17 mıllıon adam  deıdi. Oǵan seneıik. Sonda 150 mlrd AQSH dollaryn osy 17 mıllıon halyq sanyna bólsek  - 8824 dollar shyǵady eken.

Bul – Qazaqstannyń ár azamaty ol dollardy qoldaryna ustap kórmese de, shetelge osynshalyqty qaryz degen sóz. Al, onyń jyl saıynǵy ósimin qaıda qoıasyń?

Bir otbasynda ortasha 5 jan basy turady delik. Jańaǵy 8824 dollardy osy 5-ke kóbeıtsek – 44 myń 120 AQSH dollarynan aınalady eken. Bizdegi qazaqstandyqtardy qaıdam, kez kelgen qazaqtyń túsine de kirmeıtin aqsha bul!

 Jumash KÓKBÓRİ