Qazaqstan musylmandary

dinı basqarmasynyń tóraǵasy,

Bas múftı haziret 

Erjan qajy Malǵajyulyna

Bısmıllahı Rahmanır Rahım. Assalaýmaǵaleıkým, ýa Rahmatýllahı, ýa Barakatýhý.

Qadirli Erjan qajy Malǵajyuly!

Allaǵa shúkir, Elimiz táýelsizdik alǵan soń, Qazaqstan halqy Allanyń haq dini ıslamǵa jappaı bet burdy. Osynaý shynaıy qulshylyqtyń, aq tileýdiń arqasynda, jerimizge tynyshtyq, qut-bereke ornady. Ultymyz baı-qýatty turmysqa qol jetkizdi. Elbasynyń shaqrýymen álemge tarydaı shashylǵan qandastar Qazaqstanǵa kóship kele bastady. Basymyzǵa bas qosylyp, sanymyz kóbeıdi, yrysymyz tasydy...

Degenmen, osy sońǵy bes-alty jyldyń kóleminde Qazaq kóshi, belgisiz sebeptermen, saıabyrlap qaldy. Keıde jergilikti týystardan: «Osy oralmandardy qaptatyp qaıtemiz» degen kúńkildi de estip qalyp jatamyz. Halyq bolǵan soń aıtatyn shyǵar. Barlyq eldiń ulttyq sana-sezimi, bilim-qabileti birdeı emes qoı, keıde túsinýge de bolady. Desede, bir kezde Ó.S sekildi el aǵasy jasyndaǵy, ult maqtanyshyna aınalǵan kisilerdiń aýzynan dál osyndaı sózderdiń shyǵyp, efırden, gazet betinen duıym elge taraýy  jaǵamyzdy ustatqan bolatyn. Bul jaqsylyqtyń nyshany emes edi, árıne! Shyndap kelgende, biz qazaqqa shytynap shekemizden qaraıtyn halge áli jetken joqpyz. Tym azbyz. Elbasymyzdyń: «Qazaqstan halqynyń sanyn 2020 jylǵa qaraı jıyrma mıllıonǵa jetkizý kerek!» degen úndeýi baryn ózińiz jaqsy bilesiz. «Bizdiń elimiz – jas, jerimiz – ulan-ǵaıyr, halqymyzdyń sany bolsa – kóp emes. Sondyqtan Elbasy retinde elimniń bolashaǵyn oılap alań­daımyn» degeni taǵy bar.

Onyń ústine, shet elderdegi kóp qazaqtar tilinen, dininen, salt-dástúrinen aıyrlyp, ózge ultqa jutylyp barady. Bul jaǵdaı Táýelsiz eldiń árbir ımandy azamatyn beı-jaı qaldyrmasa kerek dep oılaımyn. «Kóp tilese – kól» deıdi halqymyz.

Sizden osy qandastaryńyzdyń Qara shańyraq - Qazaqstanǵa oralýyn, Alla rızalyǵy úshin ár ýaq oqyǵan namazyńyz saıyn, Jaratqannan jalbaryna tileýińizdi suraımyn. Ózińiz ǵana tilep qoımaı, Qazaqstandaǵy QMDB-na qaraıtyn barlyq meshitterdegi ımamdarǵa da tapsyrýyńyzdy, ýaǵyzǵa qosyp, úzbeı únemi aıttyrýyńyzdy ótinem.

Sonymen birge, qandastarymyzdyń kóshine kedergi jasap, qoıanbultaqqa salǵysy keletinderge, jala jaýyp, kemsitetindnrge de Allanyń zaýaly bar ekenin, ózin qoıyp, tuqym-tuqıanyna deıin eki dúnıede ońbaı ketetetinin qadap aıtýdy, qatań eskerte ketýdi umytpaǵaısyz.

Alla kóp bolyp suraǵan nárseni beredi. Ásirese, osy aılardyń sultany –  qasıetti ramazan aıynda. Qazaq kóshi qaıta bir serpin alyp, kóligin bekemdep Atajurtqa quıylyp jatsa, bólinip-jarylǵan otbasylar bir-birine qaıta qosylyp jatsa, qandaı keremet bolar edi!

Túrli kózqarastaǵy eldiń de tanymyn, senimin ózgertýge, qazaq halqynyń birligin, baýyrmaldyǵyn nyǵaıtýǵa Allanyń qulshylyq úıinen osyndaı saýaby mol kúnderde aıtylǵan bul tilek-duǵanyń áseri tipti zor bolatynyna meniń esh shúbám joq.

Alla Sizge myqty densaýlyq, uzaq ǵumyr bersin, Ereke! Elimiz aman, jurtymyz tynysh, qazaq kóshi kólikti, ustaǵan orazańyz qabyl bolsyn!

Bul ótinishim Sizge amanat!

Qurmetpen,

aqyn Aýyt Muqıbek

28.06.2014

Astana  

Abai.kz