Ótip bara jatqan 2016 jyl el esinde Almaty men Aqtóbede bolǵan teraktilermen qalary anyq. Alaıda, tanymal saıasattanýshy Marat Shıbýtov Aqparattyq-taldaý ortalyǵyna bergen suhbatynda Qazaqstannyń kúshtik qurylymdary bul qaıǵyly oqıǵalardan tıisti sabaq almaǵanyn aıtady.

Saıasattanýshy qos birdeı teraktini kez-kelgen elde, kez-kelgen ýaqytta bolýy múmkin qarýly qaqtyǵys dep baǵalaıdy.

«Mysaly, beıbit kún keship jatqan Norvegıa men Breıvıkti alaıyq. Kúlikbaev – jalǵyz terrorıst. Al, Aqtóbedegi jaǵdaı Ulttyq qaýipsizdik komıtetiniń jergilikti bólimderi jibergen aǵattyqtan boldy. Buǵan jáne DAISH-tyqtardyń úndeýi de áser etti», - degen ol bul teraktilerden qandaı da bir júıelilik baıqamaıtynyn aıtady.

«Bul jerdegi basty júıelilikti tek bizde eshkimniń naqty terorızmmen kúresýge qulyqsyz ekendiginen ǵana kóremiz. Biz janama, ekinshi kezektegi qubylystarmen kúresip jatyrmyz. Mysaly, lańkestikke qarsy zańnamalarda ańshy myltyqtaryn satýǵa qatysty normalardy kúsheıtý kózdelýde. Alaıda, lańkester men ańshylardy bir-birimen baılanystyrý qısynsyz. Iaǵnı, quqyqqorǵaý organdary lańkestik qaýiptiń qandaı da bir formaldy belgilerimen kúreskileri keledi, al, shynaıy terorızmmen kúreskileri kelmeıdi. Óıtkeni, ne ony áli kúnge qater dep sanaımaıdy nemese terrorısterden shynymen qorqady. Olaı deıtinim, eger terrorıster kúshtik qurylymdar men sýdıalarǵa qarsy maqsatty túrde belsendi shabýyl bastasa oǵan bizdiń júıe áli daıyn emes. Mundaı shabýyldardyń nege alyp keletinin biz úsh mıllıon halqy bar Daǵystan mysalynan bilemiz. Onda 2011 jyly 211 kúshtik qurylym qyzmetkeri qaza tapqan bolatyn», - deıdi Marat Shıbýtov.

Sarapshyny lańkestikpen kúreste jaıbaraqattyq tanytqan quqyqqorǵaý organdary elde úlken bir terakt bolýyn kútip otyrǵandaı áserde qaldyrypty.

«Meniń oıymsha, terorıstik shabýyldar Almatydaǵydaı aýdandyq ishki ister basqarmasyna emes, Astananyń ózine, mınıstrlikke jasalǵanda ǵana kúshtik qurylymdar bar qaýip-qaterdi tolyq  sezinetin sıaqty. Ázirge İİM ortalyq apparaty qyzmetkerlerine emes, óńirlerde aýdandyq İİB-lerge shabýyl jasalyp jatqanda eshkim buǵan mán bermeıdi», - deıdi ol.

Sondaı-aq, Úkimettegi aýys-túıister men premer-mınıstr Baqytjan Saǵyntaev kabınetiniń qyzmetine qatysty pikir bildirgen, M. Shıbýtov Baqytjan Ábdirulynyń endigi mindeti túrli narazylyq sharalary men mıtıńilerdiń bolýyna jol bermeý deıdi. Ol úshin úkimet músheleri bar jaýapkershilikti moınyna alyp, dańǵaza sharalarmen emes, mańyzdy sheshimder qabyldaýmen aınalysýy kerektigin aıtypty.

Jomart Abdollauly