2 jeltoqsan kúni tal túste páterge basyp kirip, 8 jasar qyzǵa zorlyq qylmaq bolǵan 38 jastaǵy er adam ustaldy. Pedofıl Temirtaý qalasynyń turǵyny eken.

Ótken aptada qaraǵandylyqtar «WhatsApp» arqyly bir-birine habarlama jiberip, Temirtaýda pedofıldiń júrgendigin aıtyp, saq bolýǵa shaqyrǵan. Mobıldik qosymsha arqyly taraǵan aýdıojazbada ata-analarǵa balalaryn, ásirese qyzdardy mektepten keıin kútip alý kerektigi aıtalǵan.

«Bizdiń 3 A shaǵyn aýdanda mynandaı oqıǵa boldy. Mine, 19 úı, birinshi kireberis, áli de kóp polısıa júr. Saǵat 12-den bastap. Qyz bala, bizdiń balalarmen qatarlas, ekinshi synypta oqıdy. Páterge kirip bara jatqanda, sońynan «manák» kirgen. Balany sheshindire bastaǵan. Áıteýir bala páterden qashyp ketken. Dalaǵa solaı sheshingen qalpynda júgirip shyqqan. Ne bolǵanyn tolyq bilmeımin, biraq barlyqtaryńyzǵa eskertkim keledi. Endi balalardy mektepten qarsy alýymyz kerek», - deıdi aýdıojazbadaǵa áıel daýysy.

Keıinirek belgili bolǵandaı, oqıǵa 2 jeltoqsan kúni túske qaraı bolǵan. Temirtaý qalasynyń turǵyny qyzymen birge úıine kele jatqan. Anasy dúkenge kirmek bolady. Qyzyna páterdiń kiltin berip, úıge jiberedi. Ekinshi synypta oqıtyn qyz balanyń otbasy toǵyz qabatty úıdiń segizinshi qabatynda turady eken. Balaǵa podezde belgisiz bir er adam jaqyndap, sý suraǵan. Ol páterge balamen birge ilesip kirip, oǵan tap berip, sheshindire bastaǵan. Er adam balany ish kıimine deıin sheshindirgen. Abyroı bolǵanda qyz pedofıldiń ýysynan sytylyp shyǵady. Dalaǵa ish kıimmen qashyp shyqqan balany kórshileri kórip, polısıa shaqyrǵan.

«Jedel izdestirý sharalarynyń barysynda 38 jasar Temirtaý qalasynyń turǵyny ustaldy. Ol ýaqytsha tergeý ızolátoryna qamaldy. Qazir balanyń quqyǵyna qarsy áreket faktisi boıynsha tergeý júrgizilip jatyr», - deıdi Qaraǵandy oblysy İİD-niń baspasóz hatshysy B. Qudıarov.

Derek kózi: baq.kz