4 jeltoqsan kúni «Astana-Kókshetaý» tas jolynyń boıynda iri jol apaty bolǵany belgili. Keıinirek onda qaza bolǵan 4 adamnyń esimi anyqtaldy. Ajal tyrnaǵynan aman qalǵan Danıl esimdi balanyń da ákesi tabyldy. Al osy oqıǵalardyń qaltarysynda qarshadaı balany qutqaryp, kólikte janushyra shyńǵyrǵan qyz balany da aman alyp qalamyn dep júrip ajal qushqan aýyl turǵynynyń erligi qalyp qoıdy. Ol jaıly bizge búgin ǵana málim bolyp otyr. Bul týraly inform.kz habarlady.
Redaksıaǵa qońyraý shalǵan Rahymbek Múbárakuly esimdi azamat bolǵan jaıdy baıandap berdi. Oǵan oqıǵany úsh jolaýshysy qaza tapqan kólik ıesi Erlan Sultanov keshe, 6 jeltoqsan kúni erlikpen kóz jumǵan Qumarbek Jaketaıulynyń jerleý rásimi kezinde aıtyp bergen. Oqıǵanyń uzynyrǵasy bylaı:
4 jeltoqsan kúni Býrabaı aýdany Jańajol aýylynda Qazıra Maılyhanqyzynyń jerleý rásimi bolady. Marqumnyń týǵan-týystary taıly-tuıaǵy qalmaı alys-jaqynnan jınalady. Saǵat 12:00 shamasynda Makınsk qalasynda beriletin asqa barý úshin 100-ge jýyq kólik qabir basynan attanǵan. Aldyńǵy lekte Qurmetbek esimdi azamat mingen Kia Rio «Atameken» eldi mekeninen «Astana-Kókshetaý» tas jolyna shyǵady. Burylystan shyǵa beriste olardy jol boıyndaǵy adamdar qol bulǵap toqtatýǵa tyrysady. Taıaý jerde kólikter soqtyǵysyp qalǵanyn, olardyń da soqtyǵysyp qalý qaýpi baryn solaı ym-ısharamen bildirgen. Jurttyń qol bulǵap turǵanyn kórgen Kia Rio júrgizýshisi jyldamdyǵyn báseńdete bergen. Osy sátte olarǵa «Nıssan sefıro» markaly jeńil kólik kelip soǵylǵan. «Nıssan» soqqydan soń syrǵyp baryp, óship qalǵan. Onyń júrgizýshisi birden kóligin joldyń oń jaq shetine shyǵarmaq bolyp, jurtty kómekke shaqyrǵan (ol jerde biraz adam jınalyp qalǵan eken). Kia Rio-nyń júrgizýshisi ekeýi kólikti jol shetine shyǵarýǵa árekettenip jatqanda shymkenttik nómiri bar avtobýs «Nıssan sefıro» kóligin artqy tustan kelip soqqan. Soqqy qatty bolǵan, kóliktiń júksalǵyshy salonǵa kirip ketken, al ishinde otyrǵan úsh jolaýshy jaraqat alǵan, biraq áli tiri bolǵan. Al avtobýs «Nıssannyń» aldyna baryp toqtaǵan.
Osy tusta Qumarbek Jaketaıuly asqa bara jatqan kólikterdiń birinen túsip, soǵylǵan kóliktiń qasyna jetken. Esikterdi asha almaǵan soń, aldyńǵy terezeni syndyryp, ishinen Danıl esimdi ul balany alyp shyǵýǵa kómektesken. Jol boıynda Astanaǵa qaraı ketip bara jatqan kólikti toqtatyp, oǵan balany Makınsk qalasynyń aýrýhanasyna jetkizýdi tapsyrǵan. Kólik ıesiniń esimi - Kırıll Goncharov.
Endigi sátte eki jigit (Erlan Sultanov pen Qumarbek marqum) jantalasyp, ishtegi áıelderdi qutqarmaq bolady. Biraq esikterdi asha almaıdy. Qumarbek Jaketaıuly aldyńǵy oń jaq esiktiń terezesinen jolaýshy qyzdy shyǵaryp alady. Odan soń Erlan Sultanov ekeýi qalǵan jolaýshylardy qutqarýǵa kirisedi, Qumarbek kóliktiń artqy sol jaǵyna baryp, qolyndaǵy shaǵyn ǵana súımenmen artqy terezeni opyryp, ashýǵa árekettenip jatady. İshtegi bir qyzdyń qolynan tartyp, shyǵarmaq bolyp jatqanda, arttan ekpindeı kelgen taǵy bir avtobýs «Nıssan sefırony» soqqan qalpy aldyńǵy avtobýstyń astyna tyǵyp jibergen. Osy sátte ishtegi shyńǵyrǵan qyz balany qutqarýǵa árekettenip jatqan Qumarbek Jaketaıuly eki kóliktiń ortasynda qalǵan da, «Nıssanmen» birge avtobýstyń astyna kirip ketken. Keıin onyń jansyz denesi avtobýstyń astynan tabylǵan.
Sońǵy soǵylǵan «VAN HOOL» jolaýshylar avtobýsy «Býrabaıdaǵy «Rıksos» qonaqúı kesheninen Astanaǵa bara jatqan. Onda «BI Group-tyń» 49 qyzmetkeri bolǵan. Júrgizýshi boran men kóktaıǵaqtyń saldarynan rólge ıe bola alhttp://qamshy.kz/admin/writepostmaı, «Nıssan sefıro» jeńil kóligin soqqan. Osynyń saldarynan sol kólikte otyrǵan jolaýshylar - 1984 jylǵy Alena Býhalúk (Astana turǵyny), 1994 jylǵy Qymbat Sádýaqasova (Zerendi aýdanynyń turǵyny), 1967 jylǵy Aısulý Kálenova (Astana turǵyny) jáne 1966 jylǵy Qumarbek Jaketaıuly (Býrabaı aýdanynyń turǵyny) oqıǵa ornynda kóz jumǵan.
Qutqarylǵan bala din aman, al boıjetken qyzdyń esh jeri synbaǵan, tek jeńil jaraqattar alǵan.
Qumarbek Jaketaıuly Býrabaı aýdany Jańajol aýylynyń turǵyny. 1991 jyly Mońǵolıadan atamekenge oralǵan. Artynda úsh balasy, jary qaldy. Ol ómiriniń sońǵy sátinde qarshadaı balany aman alyp alýǵa kómektesip, órimdeı jas qyzdy qutqaryp qaldy. Eki jastyń ómiri úshin óz janyn pıda etti. Bundaı erlik jasaǵan azamatty beıbit kúnniń batyry deýge ábden laıyq!
