Ashýǵa býlyqqan halyq problemasy oń sheshilmese, Ońtústik Qazaqstan oblysynyń basshysynan kómek suramaqshy. Bul týraly "31 arna" habarlady.

Qaladaǵy Abaı aýdanyna qarasty Kókbulaq turǵyn alabyn qonystanǵan qarasha halyq «úıimiz súrilip kete me?» dep zar ılep otyr. Sebebi «QazTransOıl» kompanıasy qubyrǵa jaqyn úılerge qatysty sotqa talap aryz bergen. Muny estigen 45 jastaǵy Ermahan Syzdyqov jary Baqythan Mashabaeva ekeýi bes bala-shaǵammen dalada qalyp qoıatyn boldyq dep dabyl qaqty.

Mazasy qashqan turǵyndar jergilikti ákimdikke barǵanymen ákimniń qabyldaýyna kire almaǵan. Sodan sheneýnikterdiń is-sharaǵa qatysatynyn estigen olar sonda baryp, aq jaǵalylarǵa muńyn jetkizipti.

«Aýdan ákimshiligine úsh-tórt kelinshek bolyp bardyq. Ondaǵylar «qaǵaz almaı qabyldamaımyz» dedi. Bir is-shara bolyp jatqanyn qulaǵym shalyp qalyp, sol jerden ustadyq olardy. Áıtpese ákimder qabyldaı bermeıdi eken ǵoı. Sodan soń baryp qala ákimi bizben kezdesti», - dedi Baqythan Mashabaeva.

Syzdyqovqa sottan úıi súriletini týraly talap aryz kelgen.

«Kelisim qujatynda «ary qaraı qurylys óspeıdi» dep kórsetilip, qol qoıylǵan. Biraq, ótken aıda talap aryz keldi. Onymen tanysqan soń dereý ákimshilikke baryp, kelisimniń qaıda ketkenin suradym. Ondaǵylar «eshkimge eshnárse aıtpa, ózimiz aralasyp, bitirip beremiz» dep meni toqtatty» degen Ermahan Syzdyqov úıin kúzetip júrgenin aıtyp, muńyn shaqty.

«Bizge jerdi nege oılanyp baryp úlestirmeıdi? Tym bolmaǵanda men úı salyp jatqanda bireýi kelip eskertse, túsiner edim ǵoı. Legalızasıa kezinde nege aıtpaıdy? Qujattarym qolymda», - dedi ashýyn jasyra almaǵan Syzdyqov.

Halyqtyń jan-aıqaıy qala ákiminiń qulaǵyna jetip, shahar basshysy Ǵabıdolla Ábdirahymov olarmen aqyry kezdesipti. Tek mán-jaıdy tyńdaǵan ol «qujatyń bar ma?» dep shamyna tıgen soń turǵyn Syzdyqov qolyndaǵy barlyq qujatyn kórsetip, «halyqty zar ıletý kerek pe?» dep emosıasyn jasyra almapǵan.

Osy sátte Ábdirahymov myrza «Urasyz ba meni? Men sizge kelip turmyn ǵoı sóılesýge. Siz maǵan dikeńdemeńiz» dep muńyn shaqqan turǵynǵa tap bergen. Ermahan Syzdyqovtyń jary qala ákiminen mundaı sózdi kútpegenin jasyrmady.

«Ákimnen «dikeńdeme» degen sóz estımiz dep oılamadyq negizi. «Qujatyń bar ma?» degende joldasym da ózin ózi ustaı almaı qaldy. Ákim de ondaı estımin, halyq ashýly dep oılamaǵan shyǵar... Bizdiń máselemizdi sheshý qala basshysynyń qolynan kelmese, oblys ákimine shyǵaıyn dep otyrmyz. Joly solaı eken ǵoı, aýyl ákimine kirdik. Qolynan kelmedi. Aýdan ákiminiń de, qolynan kelmedi. Qalalyq ákimdik ýáde berdi», - dedi bes balanyń anasy Mashabaeva.

Qýanyshtysy, Ábdirahymov myrza úsh aıdyń ishinde problemaǵa núkte qoıylatynyn ýáde etip ketken. Tek kimniń paıdasyna ekeni belgisiz.

Aıta keteıik, bes balanyń anasy Baqythan Mashabaeva bala tárbıesimen úıde otyr. Joldasynyń da turaqty jumysy joq. Tek jaldamaly jumysshy bolyp nápaqa taýyp, otbasyn asyrap júr.