Jartylaı qorǵaýshy Georgıı Jýkov "Qaırat" sapyna aýysty. Bul jóninde klýbtyń baspasóz qyzmeti habarlap otyr. Semeıde dúnıege kelip, sporttyq mansabyn Belgıada bastaǵan oıynshy aldaǵy úsh jylyn Almatyda ótkizbek. Álbette, birneshe jyldan beri chempıondyqqa talassa da altynǵa qol jetkize almaı júrgen "Qaırat" úshin bul jaqsy jańalyq. Ony mamandar da aıtyp jatyr. Dese de jankúıerdiń bári bul jańalyqty jaqsy qabyldaı qoımady. Ne úshin? Aıtqan sózderi men istegen isteri úshin. Jýkov ne aıtty? Ne istedi?
Áńgimeni áriden bastaıyq. Joǵaryda aıtqanymdaı, Jýkov Semeıde dúnıege kelgen. Biraq bes jasynda ata-anasymen birge Belgıaǵa kóship ketken. Fýtbol oınaýdy "Anderlehte" bastap, 16 jasynda "Beersqot" komandasymen kelisimshartqa otyrǵan. Dál sol jyly ol Reseı azamattyǵyn, artynsha Belgıa azamattyǵyn alǵan. 19 jasynda agentiniń aıtýymen ol Qazaqstanǵa qaıtyp keledi. Ómir súrý úshin emes, fýtbol oınaý úshin. Bizdiń chempıonatta shetten kelgen oıynshylar sanyna shekteý bar. Biraq "Astana" sapyna qosylǵan Jýkov Qazaqstanda dúnıege kelgendikten ol shekteý bul oıynshyǵa júrmeıdi. Sodan, bolashaǵynan úlken úmit kúttirgen ony Qazaqstan quramasyna tartý jumystary da bastalady. Alaıda, alǵashynda jastar quramasyna oınaǵan jartylaı qorǵaýshy, resmı oıyndarda Ulttyq quramaǵa oınaýdan bas tartady. Álbette, ashyq túrde emes. Shaqyrtý alǵanǵa barady, biraq túrli sebeptermen oıynǵa shyqpaıdy. Sol baıaǵy jaraqat, anaý-mynaý. Shyn máninde, onyń sebebi Belgıa men Reseı azamattyǵy bolatyn. Qysqasy, fýtbolda bir eldiń quramasy qatarynda resmı oıyndarda oınasań, odan keıin basqa eldiń quramasyna oınaı almaısyń degen jazylǵan zań bar. Sol zańdy alǵa tartyp Georgıı bizdiń quramaǵa oınaýdan qashty. Bul jaǵdaıda "Onda bizge kerek emessiń!" dep qol silteı salýǵa bolar edi. Biraq bizdiń fýtbol basshylary nege ekeni osy oıynshyǵa jabysty da qaldy. Al ol óz kezeginde qazaqtar eńkeıgen saıyn shalqaıa tústi.
Jýkovtyń kim ekenin túsingen bolarsyzdar. Endi onyń qalaı shalqaıǵanyna kósheıik. Bul jigit shalqaıǵannyń kókesin suqbat bergende jáne áleýmettik jelilerdegi pikirleri arqyly jetkizýge qumar.
Belgıalyq basylymdardyń birine bergen suqbatynda ol: "Men Qazaqstan quramasynyń bapkerine maǵan resmı oıyndarda úmit artpaýyn jetkizdim. Men óskim keledi, sol sebepti de qaı quramaǵa oınaıtynymdy áli sheshpedim. Meniń eki tańdaýym bar – Belgıa men Reseı", - degeni jankúıerlerdiń áli de esinde. Sol suqbattan keıin oıynshy áleýmettik jelide jurtpen sóz talasqa túsip, aıyppul da tólegen bolatyn. Biraq ol az bolǵan syńaıly. Aıtqan sózderi úshin aqtalyp, ózin durys túsinbegen elden keshirim surasa da Jýkov munymen toqtap qalmady. Mysaly, osy jyly shilde aıynda reseılik championat.com portalyna bergen suqbatynda ol: "Shynymdy aıtsam, men alǵashynda Qazaqstandaǵy jigitter de fýtbol oınaı alatynyna qatty tańǵaldym", - degen eken. Ashýǵa tıe me? Tıedi, árıne! Bulaı aıtatyndaı ol kim edi? Nebári 37 myń halqy bar Lıhtenshteınde dop tebetin adam tabylǵanda, Qazaqstanda tabylmaıdy dep oılady ma? Já, kelesi pikirge kósheıik. Dál sol suqbatta "Týǵan jerińizge oralǵandaǵy alǵashqy oıyńyz" degen saýalǵa bergen jaýabyn oqyńyzdar: "Araǵa uzaq ýaqyt salyp, ákem ekeýmiz Qaraǵandyǵa kelgende: "Múmkin, kesh bolmaı turǵanda bul jaqtan qaıta ketkenimiz durys bolar?" degenim esimde", - depti. Týǵan jerdi ańsap kelgen adamnyń pikirine uqsamaıdy, á?
championat.com – reseılik portal ekenin aıttym ǵoı. Solarǵa jaǵýdy oılasa kerek, sóz arasynda Jýkov: "Men ózimniń sporttyq azamattyǵymdy reseılikke aýystyrǵym keledi. Artynsha Reseı Ulttyq quramasyna qosylý úshin bar kúshimdi salamyn. Bul – meniń armanym!", - degeni bar.
"Qaıratpen" jasasqan kelisimshart boıynsha Georgıı Jýkov endi Qazaqstan quramasy úshin óner kórsetýge mindettelip otyr. Bul jańalyqty klýb basshysy Qaırat Boranbaev elge súıinshilep jetkizdi. Jasy 22-ge kelgen oıynshy Belgıa men Reseı quramalarynan kúder úzse kerek. Álbette, jumys tańdaǵanda bolashaqtan úmit kúttiretin, jalaqysy jaqsysyn, janyńa jaqynyn tańdaý – ábestik emes. Biraq Otan degende buǵan jol joq.
Italıa, Túrkıa men Germanıa oıynshylarynyń kezdesý aldynda ánurandy shyrqaǵanyn kórgende, ol elderde fýtbol nege myqty ekenin túsinesiń. Olar oıyndy oıyn úshin emes, Otan úshin oınaıdy. Artynda búkil el úmit artyp turǵanyn bilip, sezip oınaıdy. Bizde she? Ulttyq quramaǵa Jýkov syndy dúbárálardy tarta bersek, qaryq bolmaıtynymyz anyq.
Avtor: Ernar Almabek
