Bıyl «Alash» ult-azattyq qozǵalysynyń kósemi, túrki álemindegi uly qaıratkerlerdiń biri Álıhan Bókeıhanovtyń týǵanyna 150 jyl toldy. Qıly zamanda týylyp, ómirin táýelsizdik jolyndaǵy kúreske arnaǵan ǵazız jannyń atyn ardaqtap, arýaǵyn ulyqtaýǵa arnalǵan shara Muhtar Áýezov atyndaǵy Qazaq memlekettik akademıalyq drama teatrynda ótti. Atalǵan sharaǵa qatysqan Almaty qalasynyń ákimi Baýyrjan Baıbek – Elbasy Nursultan Nazarbaevtyń tikeleı usynysymen táýelsizdik ıdeıasynyń negizin salýshy Álıhan Bókeıhanovtyń mereıtoıy IýNESKO sheńberinde atalyp ótip jatqanyn aıta kele, elim degen erdiń esimi tarıhta máńgi qalaryn jetkizdi.

«Álıhan Bókeıhanov halyqtyń kókiregine ǵasyrlar boıy sher bolyp qatqan azattyq týraly ańsardy, egemen el bolý jaıly uly ıdeıany jańǵyrtýshy, Abylaı men Kenesary handardyń isterin laıyqty jalǵastyrýshy boldy. Sultanmahmutsha aıtsaq, «Qazaq úshin júrek maıyn sham qylǵan» kózsiz batyr, zamanynan ozyp týǵan bilimdi de bilikti bıik óre ıesi edi», - dedi B.Baıbek.

Búginde azattyqtyń aq tańy atyp, sol babalar armany oryndaldy. Táýelsizdiktiń 25 jyldyǵyna qadam basýdamyz. Bul ataýly datanyń ult muratyn kóksegen uly tulǵanyń 150 jyldyǵymen tuspa-tus kelýi de tegin bolmasa kerek. Óıtkeni Álıhan Nurmuhamedulynyń 150 jyldyq toıy IýNESKO kóleminde toılanýda. Bul jóninde 18 qarashada IýNESKO-nyń Parıjde ótken Bas konferensıasynyń 38-shi sesıasynda belgili bolǵan edi. Sonymen qatar, Sankt-Peterbýrgte Álıhan Bókeıhanovtyń eskertkish-bústi qoıylatyn boldy.

Saltanatty keshte Álıhan Bókeıhanovqa arnalǵan ómirbaıandyq derekti fılm kórsetildi.

Jalpy, jyl basynan beri Almaty qalasynda mereıli dataǵa oraı birneshe shara ótkizilgen. Qazaq Ulttyq ýnıversıtetinde «Álıhan Bókeıhanov jáne Alash murasy» atty ǵylymı-praktıkalyq konferensıa ótkizilse, Ulttyq kitaphanada arnaıy mereıtoılyq kórme uıymdastyrylǵan bolatyn.