Kópten kútken súıinshi jańalyq! Búgin Eýropalyq komısıanyń ushý qaýipsizdigi jónindegi komıtetiniń sheshimimen qazaqstandyq áýekompanıalar Eýrokomıssıanyń «qara tiziminen» resmı túrde shyǵaryldy. Bul týraly Investısıa jáne Damý mınıstri Jeńis Qasymbek facebook paraqshasynda jazdy.

"Qurmetti, dostar! Búgin Eýropadan qýanyshty habar jetti. Eýropalyq komısıanyń ushý qaýipsizdigi jónindegi komıtetiniń sheshimine sáıkes qazaqstandyq áýekompanıalar Eýrokomıssıanyń «qara tiziminen» resmı túrde shyǵaryldy. 
Esterińizde bolsa, «qara tizimge» «Eır Astanadan» basqa barlyq otandyq áýe kompanıalar kirgen bolatyn. Eýrokomıssıanyń búgingi resmı sheshiminen keıin otandyq áýe kompanıalarymyzdyń Eýropaǵa ushý múmkindigine endi shekteý qoıylmaıtyn bolady. 
Aıta keteıik, biz bul nátıjege qol jetkizý úshin talaı jyldan beri talmaı jumys istep kelemiz. Sońǵy jyldary otandyq áýe kompanıalarymyzdyń Halyqaralyq azamattyq avıasıa uıymynyń (IKAO) talaptaryna saı kórsetkishi 65%-dan 74%-ǵa deıin artty. Endigi kezekte biz osy kórsetkishti odan ári jaqsartýǵa, qazaqstandyq áýe kompanıalardyń halyqaralyq talaptarǵa meılinshe saı bolýyn qadaǵalaýdy jalǵastyra beremiz. Búginde mınıstrlik halyqaralyq baǵyttardaǵy áýe tasymalyn arttyrý úshin jumys jasap jatyr. Eýrokomıssıanyń búgingi sheshimi osy josparymyzdy óz deńgeıinde júzege asyrýǵa múmkindik beredi dep oılaımyz", - dep súıinshiledi mınıstr.