Tanymal jazýshy, dramatýrg Dýlat Isabekov kókeıin órteıtin máselelerdi jaıyp salyp, tipti «basyn julyp alsa» da qandaı jaǵdaıǵa qatysty pikirin bildiretinin aıtty, dep habarlaıdy NUR.KZ-tiń óńirdegi tilshisi.

Ońtústik Qazaqstan oblysynyń ákimi Janseıit Túımebaev aımaqtan shyqqan 200-ge jýyq tanymal azamattyń basyn qosyp, qamqorlyq aksıasyn ótkizdi. Aksıanyń maqsaty – alda atqarylatyn ortaq isterdi josparlap alý. «Týǵan jerdi túletý – perzenttik paryz» dep atalatyn sharaǵa memleket jáne qoǵam qaıratkerleri, aqyn-jazýshylar, qazaq estradasynyń óner juldyzdary men kásipkerler qatysty.

Olardyń qatarynda jazýshy, dramatýrg Dýlat Isabekov te bar. Sahna tórine shyqqan ol ońtústik óńiri elimizdiń yrys-quty, qazaq tili men el demografıasynyń altyn besigin ekenin atap ótti. Odan ózge Dýlat Isabekov osydan birneshe aı buryn el ishinde qyzý talqylanǵan másele – bala sanynyń artýynan bılik mektep salyp úlgermeı jatqany týraly jaıtty nazarynan shyǵarmady.

«Ótken joly bir adam bálkim ósek pe bilmeımin, «Biz mektep salyp úlgere almaı jatyrmyz, balany az týyńdar» dep aıtyp ketipti. Ony kim aıtqanyn aıtpaı-aq qoıaıyn bul jerde, shirkin-aı, sol jınalysta men bolmadym ǵoı. Basymdy sol jerde julyp alsa da: «Áı, ońtústiktiń áıelderi týmańdar endi, myna kisi sharshapty ǵoı, mektep salyp úlgere almaı jatyr eken ǵoı. Kúıeýleri men áıelderi eki jaqta turyńdar, jolamańdar bir-birińe» dep aıtar edim. Bir adamdy eki adam qyla almaı jatqanda osyndaı máselelerdi estigende kúıip ketesiń ǵoı, janyp ketesiń… Jerimizge ózimiz ıe bolý úshin sanymyz 67 mln bolý kerek» dep ashyndy jazýshy.

Eske salsaq, tamyz aıynda sol kezdegi vıse-premer Darıǵa Nazarbaeva Túrkistan qalasyna jasaǵan saparynda OQO turǵyndary halyq sanynyń kóbeıýine súbeli úlesin qosyp otyrǵany sonshalyq, memleket balabaqsha men mektep salyp úlgere almaı jatqanyn aıtqan bolatyn.