Aqtaý qalasynyń turǵyny Anar Qulbaeva NUR.KZ portalyna doner jep ýlanyp qalǵan eki balasyna dárigerlerdiń múlde qaramaǵanyn aıtyp berdi.
«1 jeltoqsan kúni eki balamdy ertip, merekede kóshege shyqtym. «Shaýrma» degen jerden doner jep, kola iship qaıttyq. Olar osyǵan deıin de doner jep júr. Úıge kelgende balalar eshqandaı shaǵym aıtqan joq. Túnge taman ekeýi de «Mama, ishimdi ýqalashy» dep jylady. Tańǵa jaqyn ekeýi de qusty. Túske deıin regıdron berip, úıden baqylaý jasadyq. Ekeýi sharshańqy ári uıqysy kele bergen soń, tústen keıin jedel járdem shaqyrttyq. №26 oblystyq juqpaly aýrýlar aýrýhanasyna alyp ketti. Ol jerge kishi qyzymdy ǵana qabyldap, ulymdy basqa aýrýhanaǵa jiberdi. Men qyzymnyń qasyna, ákesi ulynyń qasyna basqa aýrýhanaǵa jatty. Dárigerler qyzyma tek regıdron ǵana berdi. Qyzym sharshańqy, basyn kótere almaı jatsa da, erteńine bizdi úıge shyǵaryp jiberdi», - deıdi Anar Qulbaeva.
Dárigerler 4 jasar Ańsar Jumahan men 2 jasar Sezim Jumahanǵa tolyq em kórsetpeı, úıine qaıtarǵan.
«Úıge barǵan soń da qyzym uıyqtaı berdi. Álsirep bara jatqan soń taksı ustap, №26 aýrýhanaǵa qaıtyp bardym. Olar regıdron berip taǵy otyrǵyzyp qoıdy. Qolyma regıdron berip, qusyp jatqan balalardyń qasyna aparyp qosty. Al meniń balam talyp uıyqtap jatyr. Ol kózin asha almaıtyndaı álsiz boldy. Onyń dári ishetindeı jaǵdaıy bolǵan joq. Ketip bara jatty. Postta otyrǵan medbıkelerge «sıstema quıyńdarshy» dep jalyndym, «aqshasyn tóleımin» dep jyladym. Keıin bizdi ishinde kereýeti joq muzdaı palataǵa kirgizip qoıdy. Balamdy arqama salyp, dálizde júrdim. Olar sońynda kishkentaı balaǵa 4 úlken shynydaǵy suıyqtyqty jarty saǵatta quıyp shyqty. Balamdy qos qoldap ustap, aǵyzyp quıdy. Ony alǵannan keıin balanyń denesi kógere bastady», - deıdi anasy.
Anar Qulbaeva dárigerler balany jansaqtaý bólimine mindetsinip alǵanyn aıtady.
«Reanımatolog kelip: «Qoımadyńdar ǵoı, alsam alaıyn. Sender sóıtesińder» dep qolyn bulǵap, jansaqtaý bólimine áreń qabyldady. Maǵan túsindirgende balaǵa kıslorod berip jatyrmyz dedi. Sıstema alǵannan keıin qyzymnyń qanty 12-ge kóterilip ketti. Buryn ondaı bolǵan emes. Úıdegi ulym da álsirep ketken soń, sol aýrýhanaǵa ony da aldyrttym. Ýlanyp kelgen ulymdy qant dıabetimen aýyrady dep basqa aýrýhanaǵa jiberdi. Dárigerlerdiń sharýasy bolǵan joq. Basqa balalar aýrýhanasyna ulymdy arqalatyp ózimdi jiberdi. Ondaǵylar aıqaılap «ýlanǵan balany qabyldaı almaımyz» dep taǵy urysty. Balamyzdy arqalap, qaıtadan ózimiz №26 aýrýhanaǵa jiberdi», - deıdi Anar Qulbaeva.
Ata-anasynyń janushyryp em izdep júrgende dáriger bireýge telefon soǵyn keńes alǵan.
«Dáriger qasyna bizdi otyrǵyzyp qoıyp, bir saǵatqa jýyq telefonmen sóılesti.
«Balada qant dıabeti bar dep jiberip edim, olar qaıtaryp jiberdi. Oǵan qandaı dári berem» dep surap otyrdy. Qabyldaý bólmesiniń aldyndaǵy dálizge kerýet ákep sonda jatqyzyp qoıdy. Sonda túnedik. Keshkilik saǵat 11 shamasynda jansaqtaý bóliminde jatqan qyzymdy qaraýǵa bardym. Kózin ashyp jatty. Medbıkeler jaqsaryp kele jatyr dep meni kirgizgen joq.
Sap-salqyn jerde qyzym jalańash jatty. Tańerteń taǵy bardym. Dárigerler «Qyzyń álsiz, júregi aýyra ma?» dep surady. Sálden soń «qyzyń qaıtys boldy» degen habar estidim. Sodan keıingi jaǵdaı esimde joq, talyp qaldym. Olar qyzym qaıtys bolǵannan keıin ǵana balamdy jan saqtaý bólimine aparǵan», - deıdi anasy.
«Tekserý qorytyndysynda balalar etten ýlanǵan dep túsindirdi. Qazir qyzymdy jerlep, san soǵyp otyrmyn. Ulymdy keshe aýrýhanadan shyǵaryp aldyq. Balamdy shyǵarardyń aldynda bir kún buryn qasyna baryp jatqan edim. Sol kúni jansaqtaý bóliminiń qasyndaǵy palatada jattyq. Sol kezde de meniń qyzymdy qaraǵan dáriger kezekshi boldy. Túnimen jansaqtaý bóliminde jatqan balalar jylap shyqty. Men shoshynyp, uıyqtaı almaı dálizdi kezip júrdim. Sonda túnimen jylap jatqan balalardy bir dáriger kelip qaraǵan joq. Meniń qyzym da jansaqtaý bóliminde qaraýsyz qalyp qaıtys boldy. Dárigerler áli kúnge deıin balanyń aýrýhanada em alǵan qaǵazyn bermeı otyr. Men reanımatologqa «balamdy óltirgen sen» dep aıtyp kettim. Ol «sol kezde mende naýqas boldy» dep qarap tur», - deıdi Anar Qulbaeva.
