Constella, Damiani jáne LaPerla saýda markalary uıymdastyrǵan qos birdeı aýksıonnan 25 100 000 teńge paıda tústi. 6 jeltoqsanda Astanada jáne 8 jeltoqsanda Almatyda ótken osynaý sharalar «DARA» qorynyń bastamasymen júzege asyp otyr.

Aýksıonda saýdaǵa shyǵarylǵan lottardyń qatarynda tanymal mesenattar men óner juldyzdary usynǵan kartınalar da bar. Atap aıtqanda, Janna Kan, Gúlnar Mergalıeva jáne Erkesh Shakeev ózderine tıesili qundy jádigerlerin uıymdastyrýshylarǵa tegin syılady. Al, olardyń satylymynan túsken qarajatqa jańa balalar alańqaılary salynatyn bolady.

Balalarǵa arnalǵan osynaý arnaıy alańqaılardy salý ıdeıasy «DARA» qoryna tıesili. Olar kómekke muqtaj balalarǵa laıyqtalǵan. Iaǵnı, damýynda tejeýi bar sábılerdiń oınap, tipti bilim alýyna deıin jaǵdaı jasalǵan.

«Mundaı alańqaılar tek pandýspen shektelmeıdi. Munda sondaı-aq, ózdigimen qozǵala almaıtyn, kórý jáne estý qabiletteri damymaǵan balalarǵa da jaǵdaılar qarastyrylǵan. Sonymen qatar, qarapaıym balalarǵa da oınaı berýge bolady. Jalpy, salaýatty ómir saltyn qalyptastyrý úshin qajettiniń bári bar», — delingen «DARA» qorynyń baspasóz qyzmeti taratqan habarlamada.

Qazirgi tańda mundaı alańqaılar Qazaqstanda joqtyń qasy. Sondyqtan, densaýlyǵynda aqaýy bar balalar ýaqytynyń kóbin tórt qabyrǵanyń ishinde ótkizedi. Saldarynan olar qatarynan qalyp, oqshaýlanyp qalady.