2017 jyldan bastap Qazaqstandyq ıpotekalyq kompanıa halyqqa 17 paıyzben beriletin ekinshi deńgeıdegi bankterdiń ıpotekasyn 7 jyl ishinde 7 paıyzben sýbsıdıalaıtyn bolady. Osylaısha, qaryz alýshy úshin syıaqy mólsherlemesi 10 paıyzdy quraıdy. Bul týraly turǵyn úı qurylysy biryńǵaı baǵdarlamasynyń tujyrymdamasy talqylanyp jatqan úkimet otyrysynda «Báıterek» ulttyq basqarýshy holdıńi» AQ basqarma tóraǵasy Erbolat Dosaev málim etti, dep habarlaıdy Baq.kz

«Báıterek» holdıńi «Nurly jer» baǵdarlamasynyń 4 baǵytyna belsendi qatysady. Qoljetimdi ıpotekalyq qaryzdardy berý jolymen halyqtyń suranysyn yntalandyrý baǵyty boıynsha túpkilikti qaryz alýshy úshin syıaqy mólsherlemesin sýbsıdıalaý tetigi arqyly qoljetimdi turǵyn úımen qamtamasyz etýge ekinshi deńgeıdegi bankterdi tartý josparlanǵan. Bul baǵytta ekinshi deńgeıdegi bankterdiń ıpotekalyq mindettemelerin satyp alý úshin 2001 jyly qurylǵan Qazaqstandyq ıpotekalyq kompanıa operator bolady», - dedi E.Dosaev.

Onyń aıtýynsha, 2017 jyldan bastap Qazaqstandyq ıpotekalyq kompanıa halyqqa 17 paıyzben berilgen ekinshi deńgeıdegi bankterdiń ıpotekasyn 7 jyl ishinde 7 paıyzben sýbsıdıalaıdy. Osylaısha, qaryz alýshy úshin túpkilikti syıaqy mólsherlemesi 10 paıyzdy quraıtyn bolady.

«Bul aı saıynǵy tólemderi orta eseppen 30 paıyzǵa tómendetedi. 10 myńnan asa qaryz alýshy ekinshi deńgeıdegi bankter arqyly jeńildetilgen ıpoteka ala alady», - dedi ol.

2017 jylǵy respýblıkalyq búdjette ekinshi deńgeıdegi bankterdiń 125 mlrd. teńge ıpotekasyn sýbsıdıalaýǵa múmkindik beretin 10 mlrd. teńge qarajat kózdelgen.

«Qazaqstandyq ıpotekalyq kompanıanyń syıaqysy ıpotekalyq qorjyn kóleminiń 1,3 paıyzyn quraıdy. Atalǵan shara sýbsıdıalaý tetigine qatysýshy bankter sanynyń ósýin yntalandyrýǵa jaǵdaı jasaıdy», - dedi E.Dosaev.