«Anaǵa aparar jol» fılminiń bas prodúseri Álıa Nazarbaevanyń jetekshiligi arqasynda tarıhı dramanyń prokaty otandyq kınoteatrlarda sátti ótti. Endi týyndyny qazaqstandyqtar 17 jáne 18 jeltoqsanda telearnalardan tamashalaı alady.
18 jeltoqsan kúni saǵat 22:10 fılm KTK telearnasynan kórsetiledi. Reseı, Grýzıa, Armenıa, Ázirbaıjan, Ózbekstan, Tájikstan, Qyrǵyzstan, Túrkmenstan eli tarıhı dramany reseıdiń ortalyq arnasy «Pervyı kanal. Búkilálemdik jeli» jáne «Vremá» telearnasynan jeltoqsannyń 17 men 18 kúnderi kóredi.
El táýelsizdiginiń 25 jyldyǵyna arnalǵan kınokartına qazaqstan kınematografıasyndaǵy biregeı týyndy bolyp sanalady. Rejıser Aqan Sataevtyń ıdeıasyn qoldaǵan Álıa Nazarbaeva, tarıhı dramanyń keń kólemdi qamtıtyn kartına bolyp shyǵýyna múmkindik jasady. Bir ǵana qazaq otbasynyń basyna túsken qıyndyq arqyly 1930 jyldardaǵy kúlli halyq taǵdyry sýretteledi. Anasynan ajyrap qalǵan bas keıipker surapyl soǵysty kóredi. Túrli qıyndyqtarǵa qaramastan óz úıine oralýǵa tyrysady.
«Anaǵa aparar jol» kartınasy halyqaralyq deńgeıde joǵary baǵaǵa ıe boldy. Ialtada ótken «Evrazııskıı most» kınofestıvalinde fılm Gran-prı jeńip aldy. Eń úzdik áıel róli nomınasıasy boıynsha basty róldi somdaǵyn Altynaı Nógerbek úzdik dep tanyldy. Qyrkúıek aıynda Almatyda ótken halyqaralyq «Evrazıa» kınofestıvalinde Ulttyq kınematografıalyq óner jáne ǵylym akademıasynyń alǵashqy «Tulpar» premıasy tabystaldy. «Úzdik áıel róli» nomınasıasy boıynsha taǵy da Altynaı Nógerbek jeńimpaz atandy. «Úzdik operatorlyq jumys» nomınasıasy boıynsha fılmniń qoıýshy-operatory Hasan Qydyralıevke teń keler eshkim bolmady.
Sonymen qatar fılmdi jasaýshylar qazir ýaqytta týyndynyń Gala-kórsetilimin Túrkıa astanasy Ankarada jergilikti ıntellıgensıa men bıznes ókilderine uıymdastyrý jumystarymen aınalysýda. Mundaǵy maqsat – túrkıalyq kórermenderge Qazaqstannyń tarıhy men mádenıetin tereńrek tanytý. Sondyqtan jeltoqsan aıynyń sońynda uıymdastyrylatyn kórsetilim memlekettik merekege oraılastyrylyp otyr.
Fılmniń bas prodúseri Álıa Nazarbaeva qazaqstan tarıhynyń halyqaralyq deńgeıde tanylýyna súbeli úlesin qosyp otyr. Osy rette «Anaǵa aparar jol» fılmin kınoteatrlardan kóre almaǵan qazaqstandyqtar endi ony telearnadan tamashalaıdy:
17 jeltoqsan Astana ýaqyty boıynsha saǵat 15.30 – kabeldik jelidegi «Pervyı kanal. Búkilálemdik jeli»
17 jeltoqsan Astana ýaqyty boıynsha saǵat 15.30 – kabeldik jelidegi «Vremá» telearnasynda
18 jeltoqsan saǵat 22.10 – KTK telearnasynda
