Ótkende bir otyrysta jasy jıyrma beske kelgen bir tanysymyzdyń qyzyn bári otyrǵyzyp qoıyp, al kep tergesin. "Nege jigitiń joq, qashan turmysqa shyǵasyń" , "toıǵa qashan baramyz", "meniń bir týysymnyń bálenshe degen balasymen tanysasyń ba..", "osylaı júrseń qalyp qalasyń", "áke-shesheńdi ýaıymdatpaı ketseńshi tezirek..."
Ana qyz baıǵus ne derin bilmeıdi, uıalǵanynan tómen qarap, kúlip qoıyp otyr. Anasy bolsa "bul eshkimdi mensinbeıdi", "Eldiń sorly qyzdary qurly bolmady", "bir tanystaryń bolsa, tanystyryńdarshy osy qyzdy" dep odan arman qyzyn uıaltyp barady. Aqyr aıaǵynda álgi qyz ornyna turyp, basqa bólmege baryp, shyqpaı qoıdy. Keter kezde jylaǵannan kózi isip turǵanyn baıqadym. Júregim sondaı aýyryp ketti... Sebebi, osy tárizdes sıtýasıa óz basymda sońǵy kezderi jıi oryn alyp júr.
Meniń de búgingi kúni eń jek kóretin suraǵym "qashan turmysqa shyǵasyń..." Qashan shyǵatynymdy bilsem, tup-týra mańdaıyma jazyp alyp júrer edim. Qaıda barmaıyn osy suraq mezi etti. Qaı-qaıdaǵy kóshede mingen taksıstke deıin "nege boıdaq júrsiz" dep "naglo" suraıdy. Týǵan-týys jaıly aıtpaı-aq qoıaıyn. Ótinish, dál osy suraqty qoıar aldyn oılanyńyzdarshy... Qaı qyz aq kóılek kıip, súıgenine qosylyp, baqytty ómir súrgisi kelmeıdi?! Bul problema 20-25 arasyndaǵy barlyq qyzdyń basynda bar ekenine senimdimin. "Qudaı bermegendi tartyp ala almaısyń" demeı me?! Kimniń de bolsyn peshenesine jazylǵan bireýi bar bolar. "Sen súıgen adam seni súımeıdi", "Seni súıse boldy, seniń súıýiń shart emes", " Janyńdy baqsa jetedi", "Esi bar jigittiń eteginen usta", "túrine qarama", "jumysyna qarama", "jaǵdaıyna qarama"... bitpeıtin keńester...
Qudaı-oý, bir aq ret beriletin ómirde nege qyzdar eshteńege qaramaýy tıis? Nege súımeýi kerek? Qazirgi úılene salyp, ajyrasýdyń bári osyndaı "aqyldylardyń" aqylyn tyńdaǵannan bolar dep oılaımyn keıde... Nebári jıyrma úsh jastaǵy maǵan kúnine qyryq aqyl aıtatyn adam tabylady. Solarǵa qarasam, men qartaıyp, srogy ótip, eskirip bara jatqan zat sekildimin. Meniń súıýge, tańdaýǵa, túrine, bilimine, jumysyna, aqyr aıaǵy jaǵdaıyna qaraýǵa da qaqym joq. "Eshteńge qarama, tıe ber". Sondaǵy bar aıybym jasym 24-ke ketip bara jatqany. Eki jyldan soń 25-ke kelsem boldy, eshqashan turmys qurmaı qalatyn sıaqtymyn. 25-FOBIA. Týǵan -týys, bútin bir áýlet seniń eki jyldan keıin 25-ke keletinińdi esińe sala beredi. Sen qansha ózińe senimdi, ustamdy, ar-ıbańdy saqtaǵan qyz bolsań da, ana sózderden keıin kádimgideı oılanyp, ishteı byt-shyt bolyp qalasyń... Qaıda barsań sol áýen. Eshkimdi seniń ındıvıd ekeniń, óz oıyń, óz tańdaýyń, óz qalaýyń bar ekeni qyzyqtyrmaıdy. "Aspannan jerge tús", "murnyńdy shúıirme" deıdi. Olarǵa qarasań, seniń aıaǵyńnyń astynda jigit shashylyp jatqandaı, sen bolsań eshkimdi unatpaı, ıdealnyı "Prınsty" kútip júrgen "Ózinshesiń"... Janashyrlyqpen aqyl aıtyp, keńes beretinderdi túsinemin. Biraq, bir ýaqyt sol qyzdardy da túsinińizdershi. Bálkim, oǵan ózi oılaǵan adam jolyqpaǵan bolar... Qaıta-qaıta bir suraqty aıtyp, jalǵyz júrgenin betine basyp, júrekterin aýyrtpańyzdarshy. Jalpy, kimnen bolsyn "Qashan turmysqa shyǵasyń, nege jigitiń joq" dep suraýdyń ózi yńǵaısyz emes pe?! Árkimniń óz shekarasy, óz álemi bolady ǵoı. Ol máreden asyp, onyń sebebi men saldaryn surap, tergeýge alý, eki saǵat moral oqý ol adamǵa da unaı qoımaıdy.
Osyndaıda jıyrma birinshi ǵasyrda týylǵanyma qýanyp qalamyn. Baıaǵy zaman bolsa, qudaı biledi qansha jasymda uzatyp jiberer edi, onyń ózi ádebı kitaptardan oqyp júrgen Juman tazdaı bolyp júrse, qursyn oılaǵym da kelmeıdi. Osyndaı sıtýasıalarda jalpy ne isteý kerek? Qyzdardy osylaı qyspaqqa alǵan durys pa?
Avtory: Aıjan Qalıeva
