Qazaqstan prezıdentiniń burynǵy kúıeý balasy, byltyr aqpanda Vena túrmesinde óli kúıinde tabylǵan Rahat Álıev kisi qolynan qaza tapqan. Avstrıalyq aqparat quraldarynyń habarlaýynsha, bul týraly 12 jeltoqsanda Venada ótken baspasóz konferensıasynda nemis profesory, býyndyrý jáne asyp óltirý isteri boıynsha maman Bernd Brınkmann málimdedi. Ol resmı sot-medısınalyq saraptamasynyń "Álıev ózi asylyp óldi" degen tujyrymyn qate dep atady. Brınkmann Álıevtiń máıitine jasalǵan patalogoanatomıalyq zertteýlerden soń marqumdy denesinde zorlyq izderi asa bilinbeıtindeı deńgeıde býyndyryp óltirgen degen qorytyndy jasaǵanyn aıtty. Bul týraly Azattyq radıosy habarlady.
Baspasóz jıynynda Álıevtiń jesiriniń advokattary qazir tergeýdi qaıta júrgizdirtýge talpynyp jatqanyn aıtty.
Bir kezderi Qazaqstannyń Avstrıadaǵy elshisi, Qazaqstan Ulttyq qaýipsizdik komıteti tóraǵasynyń orynbasary bolǵan Rahat Álıev keıin Nursultan Nazarbaevty synap shyqqan. Al 2007 jyly oǵan qazaqstandyq eki bankırdi óltirýge tapsyrys berdi degen aıyp taǵylǵan. Álıev aıypty moınydamaı, onyń saıası astary bar dep málimdegen. Álıev qýǵynǵa ushyraǵan soń áıeli, Nursultan Nazarbaevtyń úlken qyzy Darıǵa Nazarbaevamen ajyrasyp, keıin basqa adamǵa úılengen.
Vena túrmesinde 2014 jyldyń maýsymynan beri qamaýda otyrǵan Rahat Álıevke Avstrıa prokýratýrasy jarty jyldan keıin «Nurbanktiń» eki top-menedjeri - Joldas Temirálıev pen Aıbar Hasenovtiń ólimine qatysy bar dep aıyp taqqan. Qazaqstan bıligi ony «eki adamdy urlap áketip óltirdi ári memlekettik tóńkeris ázirledi» degen aıyppen syrttaı 40 jylǵa sottaǵan. Al 2015 jylǵy aqpannyń 24-i kúni onyń túrmeden óli kúıinde tabylǵany habarlanǵan.
