Bıyl Qazaqstannyń táýelsizdik alǵanyna 25 jyl toldy. Aıtýly dataǵa oraı QR Prezıdenti Nursultan Nazarbaev raqymshylyq jarıalaý týraly zań jobasyn usynyp, memlekettik qyzmetkerlerge qarjylyq syıaqy berýge tapsyrma berdi. Budan bólek el kóleminde túrli is-sharalar, merekelik konsertter ótkiziledi. Al qazaqstandyqtar táýelsizdik kúnin qalaı atap ótetinin bilý úshin birneshe mádenı ortalyqqa habarlasyp, qazaqstandyqtardyń arasynda saýalnama júrgizdik.
Iýlıa Pak, zeınetker: «Men kóp qabatty úıde turamyn. Osy jyly táýelsizdik kúnine oraı ádettegideı aýlada dastarhan jaıamyz. Bul bizdiń úıdiń aqsaqaldary úshin jyldaǵy dástúrge aınalǵan. Barlyǵyn ózim uıymdastyryp jatyrmyn. Aqsha jınamaımyz. Kim ne alyp kele alady, sony ústelge qoıamyz. 16 jeltoqsanda qaıtys bolǵandardyń qurmetine bir-eki staqan iship qoıatynymyz da bar. Bir jaǵynan bas qosýǵa taǵy bir sebep».
Vasılıı, menedjer: «Táýelsizdik kúnine oraı tórt kún demalys beriledi. Osy demalysty eshteńke istemeı, úıde jatamyn. Sońǵy bir aıda jumys qarbalas bolǵandyqtan, uıqyny qandyryp, demalýǵa tamasha múmkindik týyndap tur».
Tamara, zeınetker: «Men úshin 16 jeltoqsannyń basqa kúnderden esh aıyrmashylyǵy joq. Zeınetker bolǵandyqtan, kóp ýaqytym úıde ótedi. Táýelsizdik merekesinde de úıde bolamyn. Ádettegi dastarhan, ádettegi kún».
Arman, stýdent: «Men jataqhanada turamyn. Sondyqtan, demalys bolsa qýana-qýana úıge baramyn. Úıde ótkizgen árbir kúnim men úshin meıram».
Gýzelá, esepshi: Áıel adam úshin meıramardyń qurmetine beriletin demalys – demalýǵa emes, úıdegi jınalyp qalǵan sharýalardy aıaqtaý úshin qajet sekildi. Sondyqtan, táýelsizdik kúnin erekshe atap ótemin dep aıta almaımyn. 4 kún demalysta úı sharýasymen aınalysamyn. Al jumys bastan asady».
Lılıa Starova, medbıke: «Men ózimniń negizgi jumysymnan bólek, ýaqytym bolǵanda jelilik marketıńpen aınalysamyn. Táýelsizdik kúnine oraı beriletin 4 kúndi maksımaldy túrde paıdalanǵym keledi. Almatydaǵy iri saýda ortalyqtaryndaǵy býtıkterdi aralap, taýar usynamyn. Menimen áriptes bolýǵa úgitteımin. Jelilik marketıńpen aınalysatyndar meni túsinedi. Sondyqtan meıramda demalmaımyn».
Igor, stýdent: «Meniń oıymsha, Qazaqstanda táýelsizdik merekesin kóp eshkim toılamaıdy. Bul árıne úlken mereke. Desek te, ol jańa jyldyń tasasynda qalyp qalady. Máselen men jańa jylǵa daıyndyǵymdy bastap kettim. Qaıda, kimmen ótkizetinimdi kázirden bastap oılap júrmin. Al 16 jeltoqsan ádettegi demalys sekildi ótip ketedi
Tursynaı Ismaılova, Islam memleketi Irannyń Qazaqstandaǵy ókildiginiń qyzmetkeri: «Táýelsizdik kúnine oraı bizdi birneshe konferensıalarǵa shaqyrdy. Máselen, jaqynda Ál-Farabı atyndaǵy QazUÝ táýelsizdik kúnine oraı uıymdastyrylǵan konferensıasyna bardyq. Stýdent jastardy merekemen quttyqtap qaıttyq. Endi Abaı atyndaǵy QazUPÝ-da da ótpek. Soǵan baramyz. Al ortalyq eshteńke uıymdastyrmady. Jylda erekshe is-shara jasaımyz dep aıta almaımyn. Sebebi oǵan qarajat bólinbeıdi».
Goldberg Maıseı, «Alef» evreı mádenı ortalyǵynyń tóraǵasy: «Bizdiń ortalyq táýelsizdik kúnine oraı Astananyń shalǵaı aýdandarynda konsert ótkizdi. Qala ortalyqtaryna kelýge kóbine múmkindikteri bola bermeıtin aýdandarǵa mádenı demalys uıymdastyryp berdik».
Ádil Lıan, telejúrgizýshi: Osy jyly táýelsizdik merekesin otbasymen birge, qala syrtyndaǵy úıde ótkizbekshimin. Men jylda bul merekeni dúrkiretip atap ótemin. Shet elde júrgende de táýelsizdik merekesin umytpaıtyn. Máselen, Londonda júrgende, táýelsizdik kúnin shet eldik dostarymmen birge atap óttim. Olardy qazaqstannyń mádenıetimen tanystyryp, tarıhy týraly aıtyp berdim. Al osy jyly táýelsizdik merekesin elimizde emes, ystyq aımaqta, jaǵalaýda ótkizgim keledi. Alaıda bul armanym bıyl oryndalmaıtyn sıaqty».
Petr Svoık, saıasattanýshy: Men jylda seriktesterimmen birge alańǵa baryp, gúl shoqtaryn qoıatynmyn. Osy jyly merekeni ózgeshe atap ótpekpin. Jaqynda meni Astanada táýelsizdik kúnine oraı uıymdastyrylyp jatqan merekelik is-sharaǵa shaqyrdy. Qýana-qýana baramyn.
Alekseı Chjen, Kazakhstan Fashion Week dırektory: Mereke kúnderi respýblıka saraıynyń janynda Qazaqstannyń úzdik dızaınerleriniń eńbekteri kórsetiledi. Bul táýelsizdigimizge 25 jyl tolýyna oraı uıymdastyrylyp jatqan is-shara. Onda 25 jyl ishinde, sán áleminde qandaı jetistikterimiz jóninde aıtylady, konkýrstar uıymdastyrylady. Osy merekelik sharanyń uıymdastyrýshysy retinde, táýelsizdik kúni jumysta bolamyn.
Dılmýrat Baharov, «Dervıshı» tobynyń ánshisi: Otbasymyzben 16 jeltoqsanda aýylǵa týystarymyzǵa baramyz dep josparlap qoıǵanbyz. Sebebi osy jyly eshqandaı merekelik konsertke shaqyrtý joq. Merekeni jumysta, sahnada qarsy alǵan ózime unaıdy.
Ánshi Dılnaz Ahmadıevaǵa da qońyraý shalǵan edik. Menedjeri áleýmettik jelige hat jazýymyzdy surady. Resmı hat joldandy. Alaıda ánshiden eshqandaı jaýap kelmedi.
Saýalnamany júrgizgen: Ásem Álmuhanbet
