Keshe Eńbek jáne halyqty áleýmettik qorǵaý mınıstri Tamara Dúısenova hanym jaqsy jańalyǵymen bólisti.  Endigi jerde Atajurtyna oralǵan aǵaıyndar Qazaqstannyń kez kelgen óńirine qonystanyp, «Oralman» mártebesine qol jetkize alady. Esterińizde bolsa, bıyl kóktemde Úkimet qabyldaǵan №248 qaýly boıynsha oralmandar tek Qazaqstannyń 7 oblysyna ǵana qonystanýǵa quqyly bolatyn. Olar negizinen soltústik oblystar edi.

Al, osy 8 shildede qabyldanǵan №783 Úkimet qaýlysy boıynsha oralmandar Almaty jáne Astana qalalarynan tys Qazaqstannyń kez kelgen aımaǵyna oryn tebe alady.

Eńbek jáne halyqty áleýmettik qorǵaý mınıstrliginiń basqarma basshysy Marat Toqsanbaevtyń aıtýynsha, qandastarymyz qazirgi múmkindikti paıdalanyp, «Oralman» kýáligin alyp, sol arqyly «Yqtıar hatqa» qol jetkize tursa, kúzge qaraı olarǵa azamattyq berý máselesi oń sheshimin tabady.

Bul degen sóz Qazaqstannyń qaı túkpirine barsada oralmandarǵa esik ashyq degen sóz. Aıtalyq, Almaty oblysyna qonystanyp, qujat máselesin retteı almaǵan 100-ge jýyq otbasy endi keri qaıtpaıdy.