Keshe Malaızıanyń Malaysia Airlines áýe kompanıasyna tıesili Boeing 777 ushaǵy belgisiz zymyran shabýylyna ushyrap, Ýkraınanyń Donesk oblysyndaǵy Torez qalasy mańyna qulaǵan.
«Amsterdamnan Kýala-Lýmpýrǵa 10 kılometr bıiktiktegi halyqaralyq áýe korıdorymen ushyp bara jatqan ushaq Reseı áýe keńistigi aýmaǵyna kirýge 50 kılometr qalǵanda apatqa urynǵan. Jergilikti ýaqyt boıynsha saǵat 16:20 kezinde ushaq baılanystan ajyrap qalǵan» dep jazady «Azattyq.org».
Qazirgi málimetterge súıensek, ushaqta 295 adam bolǵan. Ýkraına tótenshe jaǵdaılar mınıstrliginiń habarlaýynsha, ushaqtaǵy adamdar túgel qaza tapty. Beıresmı derekterge súıensek olardyń ishinde balalar sany – 80.
Ýkraına syrtqy ister mınıstriniń keńesshisi Anton Gerashenkonyń habarlaýynsha, reseıshil separatıster ushaqty «Býk» zenıtti zymyranymen atyp túsirgen. Separatıster 14 shilde kúni Lýgansk oblysynda 6 kılometr bıiktikte ushyp bara jatqan An-26 transport ushaǵyna da zymyran atyp, apatqa ushyratqan bolatyn.
«Azattyq.org»-tyń jazýynsha, ózin DHR qorǵanys mınıstri dep ataıtyn Igor Strelkov ushaq apatynan soń 25 mınýt óte "VKontakte" áleýmettik jelisindegi paraǵynda: "Torez mańynda jańa ǵana An-26 ushaǵy atyp túsirildi. "Progres" shahtasy jaqta jaırap jatqan shyǵar. "Bizdiń aspanda" ushpańdar dep eskerttik qoı" degen jazba jarıalaǵan.
