Qazaq Geografıalyq Qoǵamy Álıhan Bókeıhannyń 150-jyldyq mereıtoıyn «Álıhan álemi» kitabynyń tusaýkeserin jasap qorytyndylady. Bul týraly «Qamshy» portaly habarlaıdy.
Qazaqstan Respýblıkasy Ulttyq Kitaphanasynda Qazaq tarıhyndaǵy kórnekti tulǵa, qoǵam qaıratkeri Álıhan Bókeıhannyń 150-jyldyq mereıtoıy aıasynda atqarylǵan sharalardy qorytyndylaýǵa arnalǵan dóńgelek ústel bolyp ótti. Dóńgelek ústelge Mámbet Qoıgeldi, Aıgúl İsimaqova, Beıbit Qoıshybaev, Orynaı Jubaeva, Qaıyrbek Kemeńger sıaqty tanymal qazaqstandyq ǵalymdar, tarıhshylar, alashtanýshylar jáne basqa da «Alash» qozǵalysynyń kóshbasshysynyń tarıhı, mádenı murasyn zertteýshiler qatysty.
Dóńgelek ústel barysynda Qazaq Geografıalyq Qoǵamynyń qoldaýymen shyǵarylǵan, ulaǵatty ǵalym, aǵartýshy, saıasatkerdiń ómiri men shyǵarmashylyǵyna arnalǵan «Álıhan álemi» kitaby tanystyryldy. Basylymdaǵy materıaldardyń biraz bóligi QazGeo uıymdastyrǵan ǵalym, aǵartýshy, saıasatker Álıhan Bókeıhannyń 150-jyldyq mereıtoıyna arnalǵan halyqaralyq ekspedısıa barysynda jınaqtalǵan. Eske sala ketsek, ótken jazda alashtanýshylar, tarıhshylar men jýrnalıster toby kórnekti ǵalymnyń Qazaqstan, Reseı jáne Belorýs elderinde ómir súrip, eńbek etken jerlerine baryp qaıtty. Atap aıtsaq, ekspedısıa marshrýty Aqtoǵaı-Karaǵandy-Qarqaraly-Semeı-Omby-Peterbor-Vyborg-Mınsk-Samara-Orynbor-Máskeý qalalaryn qamtydy.
Baspagerlerdiń sózinshe, «Álıhan álemi» kitaby oqyrmandardy Álıhan Bókeıhannyń ómiri men eńbekterindegi qyzyqty derektermen tanystyrý men nasıhattaýǵa baǵyttalǵan.
“Men kitapty basyp shyǵarýdaǵy kómegi úshin Qazaq Geografıalyq Qoǵamyna alǵysymdy aıtamyn. Kitap eki bólimnen turady. Birinshi bólimde Á.Bókeıhannyń eńbekteri boıynsha geografıalyq jáne ataýlyq kórsetkish keltirilgen. Bul aqparat Álıhan Bókeıhannyń toǵyz tomdyq shyǵarmalar jınaǵyn taldaý barysynda qurastyryldy. Onyń kómegimen ǵalymnyń murasyn zertteýshiler qyzyqtyrǵan materıaldaryn ońaı taba alady. Ekinshi bólimge «Alash» kóshbasshysynyń murasy boıynsha zertteýlerim men QazGeo ekspedısıasynyń nátıjeleri engizildi. Ekspedısıa barysynda kórnekti ǵalym jáne aǵartýshy jaıly biregeı aqparat jınadyq. Kitapqa Á.Bókeıhannyń eńbekterinde atalyp ótken tanymal tarıhı tulǵalardyń fotografıalary men baspasóz basylymdarynyń sýretteri qosylǵan”, - dep atap ótti Qaıyrbek Kemenger.
Sonymen qatar Álıhan Bókeıhan qazaq tilindegi alǵash geografıa jáne astronomıa oqýlyǵynyń avtory retinde tanymal. Ol Orys Geografıalyq Qoǵamynyń múshesi boldy, patshalyq jáne sovet bıligi kezinde de birneshe ǵylymı-geografıalyq ekspedısıalarǵa qatysty. Á.Bókeıhannyń 150-jyldyǵyna arnalǵan merekelik is-sharalar IýNESKO aıasynda Qazaqstanda jáne basqa da memleketterde atap ótildi.
