Reseı qarjy mınıstrligi 2016 jyldan bastap, "Baıqońyrǵa" qarjy bólýdi toqtatýy múmkin. Bul týraly málimetti Roskosmos basshylyǵyna silteme jasaǵan"Izvestıa" jazady.
Derekkózdiń málimetine qaraǵanda, sońǵy eki aptada federaldyq búdjettiń 2016-2018 jylǵy jobasynda zymyran-ǵarysh salasynyń pozısıasy nasharlaǵan. Basylymnyń málimdeýinshe, qarjy kóleminiń qysqarýy 2015 jyly iske qosylýy tıis "Vostochnyı" kosmodromynyń salynýymen baılanysty bolýy múmkin.
"Búdjet jobasynyń aldyńǵy nusqasynda Baıqońyrǵa 2016 jyly 2,5 mıllıard rúbl bólý qarastyrylǵan bolatyn. Bul qarjy qyzmetkerlerdiń jalaqysy men nysannyń jumys qabiletin saqtap turý úshin qajet. Biz odan kóp suraǵanbyz. Alaıda qarjy mınıstrliginde bizdiń ókilimizge kórsetken búdjet jobasynyń sońǵy nusqasynda, tipti bir tıyn da qarastyrylmapty. Iaǵnı bul bizdiń kosmodromdaǵy mamandar ujymyna qarjy berilmeıdi degen sóz. Bizdiń ókilimiz nelikten qarjy qarastyrylmaı otyrǵanyn suraǵanda, oǵan "qarjy jańa qurylǵan Vostochnyı kosmodromyna bólinedi" dep aıtypty" deıdi basylymǵa bergen suhbatynda Ǵarysh ınfraqurylymyn paıdalaný ortalyǵynyń bas dırektory Sergeı Lazarev.
"Baıqońyr" - Qazaqstan aýmaǵynda 1955 jyldan bastap jumys istep turǵan halyqaralyq ǵarysh aılaǵy. Birlesip keshen quryp otyrǵan Baıqońyr qalasy men "Baıqońyr ǵarysh" aılaǵyn Reseı 2050 jylǵa deıin jalǵa alǵan bolatyn.
Tengrinews.kz
