Osyǵan deıin aqparat quraldarynda Shyńjańda etnıkalyq uıǵyrlarmen hanzý ulty arasynda qaqtyǵys týylǵany, oqys oqıǵa saldarynan ondaǵan adam opat bolǵany habarlanǵan edi. Poshtamyzǵa atalǵan jaǵdaı týraly tómendegideı aqparat pen fotosýretter kelip tústi. Onda avtor qytaı bıliginiń ıslam dinine degen qatygezdigi men ondaǵy ult aralyq qaqtyǵystardyń qandastarymyzǵa da keri áseri bolyp jatqanyn tilge tıek etken.
*** *** ***
2014 jyly 28 shilde kúni Qytaıdyń Shyńjań avtonomıaly okrýgine qarasty Qashqar aımaǵynyń Charshan aýdanynda qarýlanǵan top saqshy bólimshesi men úkimettik uıymdarǵa shabýyl jasaǵan. Qytaı telearnasynyń taratqan aqparattaryna qaraǵanda 10 neshe adam ólgen. 31 avtokólik zaqymdalyp, 6 kólik órtelgen.
Bir bólim ǵalamtor habarlaryna qaraǵanda Uıǵyr ultshyldary Qytaı bıliginiń din men tilge jasaǵan qysymynyń kúsheıýine qatty óshikkeni aıtylǵan. Tipten namazǵa nemese meshitke barǵan azamattardy da jazaǵa tartyp, jumystan qýdalaǵan. Bul jergilikti ulttyń yzasyn týdyrǵan bolýy múmkin. Endi bir jaǵynan uıǵyr táýelsizdigi úshin kúresip júrgen azamattardyń josparly qımyly bolýy da yqtımal.
Bundaı jaǵdaılar Qytaıdyń Shyńjań provınsıasyndaǵy saıasatyna qatty yqpal etýde. Ásirese qandastarymyzdy da sharpyp jatyr. Sebebi, Qytaı úkimeti bul óńirge han ultyn kóptep kóshirip ákelýde. Al kóship kelgen qytaılar uıǵyrlardyń óltirip ketýinen qorqatyndyqtan ońtústiktegi uıǵyrlar kóp qonystanǵan jerge barýdan jasqanady. Ondaı jaǵdaıda qytaılar qazaǵy basym soltústik aýdandarǵa qonystanady. Mine bul qazaq kóptep qonystanǵan aýmaqqa aýyr qysym bolatyny belgili. Ekinshi jaǵynan, qytaı jumyssyz júrgen uıǵyr, qazaq azamattaryn áskerge jáne polısıa qyzmetine kóptep alýda. Budan bylaı batys Qytaıda ulttyq másele týylsa, sol áskerler men ulttyq saqshylardy qarsy salýdy josparlaýda.
Beısen Ahmetuly
