Ýkraınanyń shyǵysynda apatqa ushyraǵan malaızıalyq Boeing 777 ushaǵy qurbandaryn eske alý úshin Avstralıada 7 tamyz qaraly kún dep jarıalandy
Bul týraly atalmysh eldiń premer-mınıstri Tonı Ebbottiń ǵalamtordaǵy resmı paraqshasynda habarlanǵan, dep jazady RIA Novostı. Mundaǵy aqparatqa sáıkes, 7 tamyz kúni eldiń barlyq úkimettik mekemelerinde, sondaı-aq Avstralıanyń shetelderdegi dıplomattyq ókilettilikteriniń ǵımarattarynda memlekettik týlar tómen túsiriledi. Sonymen qatar Melbýrndegi qasıetti Patrık soborynda dál osy kúni konfesıaaralyq sıpattaǵy ulttyq memorıaldyq rásim ótedi.
«Bul rásim apattan qaza tapqandardy eske alý men olardyń jaqyndaryna qoldaý kórsetý maqsatynda uıymdastyrylyp otyr. Biz árıne, qaza tapqan 298 adamnyń barlyǵy úshin qaıǵyramyz, degenmen, Avstralıa týǵan úılerine aınalǵan 38 jerlesimizdiń qazasy janymyzǵa qatty batady. Olardyń otbasylarynyń qaıǵysyna ortaqtasyp kóńil aıtamyz jáne osynaý qıyn kezeńderde kómek qolymyzdy sozýǵa ázirmiz», - deıdi el úkimetiniń basshysy.
Kazinform.kz
