Týǵan jerdi tastap musylman memleketine kóshý múmkin be? Musylman jigitine ǵashyq bolyp qalǵan jaǵdaıda, bul ábden múmkin. Sol sekildi lenta.ru saıtynda jarıalanǵan musylman jigitke ǵashyq bolǵan 29 jastaǵy Krıstına atty Máskeýlik qyzdyń Abý-Dabıdegi ómiriniń qalaı ótip jatqandyǵy jaıly áńgimesiniń qazaqsha nusqasyn  «Qamshy» portaly oqyrman nazaryna usynady.

«Bul jaqta aýa-raıy óte ystyq, jazdyń kúni +50-ge deıin jetedi. Sol sebepti jazda  Máskeýdegi ata-anamnyń janyna úsh aıǵa kelip qonaqtaımyz.

Ata-anam meni, meniń tańdaýymdy túsine aldy ma degen suraq meni áli kúnge deıin mazalaıdy. Ózim de ana bolǵandyqtan olardy túsinemin, men úshin alańdaıdy, qorqady. Olarǵa kúnige telefon shalyp, sóılesip turamyn, alaıda, munyń jetkiliksiz ekenin túsinemin. Múmkin, olar maǵan renjýli shyǵar. Bir jaǵynan, biz jyl saıyn jazda úsh aı ata-anammen birge bolyp, qastarynan aıyrylmaýǵa tyrysamyz. Eger biz kórshi aýdanda turǵan bolsa, tek demalys kúnderi ǵana kóriser edik.

Ár kezde de otbasymmen qoshtasqan óte qıyn, qastarynda qalǵym keledi. Alaıda, balalaryma qaraımyn da, Abý-Dabıde turǵan durysyraq dep oılaımyn. Máskeýdegi balalar alańyna barǵanymda balalaryma bul jerge úırený qıyn ekendigin baıqaımyn. Úlken ulymnyń esimi brıtandyq bolǵandyqtan, ony kóp mazaqtap, til tıgizedi. Máskeýde ulymdy «chýrka» dep te ataıdy. Mundaǵy kishkentaı balalar oıyn alańdaryna keledi de, kim bárinen kúshti isteıdi, kim kóbirek biledi, kimniń oıynshyǵy jaqsy dep ózara talasqa túsedi. Meniń balalarym ony túsinbeıdi, olar jáı ǵana oınaǵysy keledi.

Biz Abý-Dabıde máńgilik qalamyz ba, bilmeımin. Aldyńǵy jyldary balalarymdy basqa eldegi mektepte oqytý kerek dep oılaıtynmyn. Sodan Anglıaǵa baryp kórdik te, Abý-Dabıde qalǵanymyz durys dep sheshtik. Uly Brıtanıa jaman memleket emes, alaıda bizge osy jaqta jaqsy. Arab Ámirlikterinde qylmys degen joqtyń qas, alkogól men esirtkige qatań tyıym salynǵan. Árıne, qajet etken adam tabady ǵoı, degenmen, ana retinde meniń júregim osy elde tynyshtyq tabady.»

Aýdarǵan: Nazerke Labıhan