QR Prezıdenti Nursultan Nazarbaev Qazaqstandyq balalardy bilim jaǵynan qatty qystamaı, oqý júıesindegi reformalardy qaıta qaraýdy tapsyrdy dep habarlaıdy liter.kz, málimettiń qazaqsha nusqasyn «Qamshy» portaly oqyrman nazaryna usynady.

«Biz kishkentaı balalarǵa tym aýyr júk artamyz, mundaı bilim júıesi eshbir elde joq. Keıde biz amerıkandyqtar Ázirbaıjan men Tájikstandy ajyrata almaıdy dep synaıtyn edik, ol rasymen de solaı, mundaı nárselerdi amerıkalyqtar óse kele úırenedi.  Olar ómir súrýdi, óz bilimin qalaı paıdalanýdy, ómirde aıaqqa turyp ketýdi úırenedi. Al biz ony óte erte bastan úıretemiz, baıǵus kishkentaı balalarymyz tańnan keshke deıin kúnniń jaryǵyn kórmeıdi», - dep málimdedi Elbasy seısenbi kúni bolǵan HHİV Qazaqstan halyq Assambleıasynda. Elbasynyń oıynsha, oqý júıesi reformasynyń aınalasyndaǵy daý-damaı aqparattyń jetkiliksiz  bolǵkandyǵynan jáne sheshimdi durys qabyldamaǵandyqtan paıda boldy.

«Oqý júıesindegi jańa reformany halyqtyń oıymen sanaspaı, pikirin tyńdamaı qabyldaı saldy. Mundaı ózgerister oqýshylardyń bilim deńgeıin kóterý úshin qajet. Barlyq taraptyń pikiri qaralýy tıis. Oılanbaı jasalǵan tájirıbeler qajet emes, bizdi eshkim qýyp bara jatqan joq», - dedi Nursultan Nazarbaev.

Sonymen qatar, bes kúndik oqý júıesin engizgennen soń mamandardy qysqartýdyń qajeti joq, barlyǵyn oqý josparyna yńǵaılap jasalýy kerek ekendigin qosa ketti.