Daýys berý negizinde eń úzdik tumar dızaınynyń ıesi anyqtalatyn bolady. QazAqparattyń jazýy boıynsha bul týraly búgin Astanada ótken baspasóz máslıhatynda «Astana EKSPO-2017» UK» AQ marketıń jáne qoǵammen baılanys departamentiniń dırektory Ásel Qojaqova aıtty: «EKSPO-2017 halyqaralyq kórmesi tumarynyń avtory quny 7 myń dollarlyq kelisim-shartqa qol qoıý múmkindigine ıe bolady. Biz jeńimpazben odan ári de jumys jasaı beretin bolamyz», - dedi ol óz sózinde.

Aıta keteıik, EKSPO - 2017 kórmesiniń úzdik maskot dızaıny boıynsha halyqaralyq baıqaýdyń irikteý kezeńi bıylǵy 20 mamyr men 20 maýsym aralyǵynda ótken bolatyn. Jarysqa 80-nen astam joba túsken. baıqaýǵa AQSH, Brazılıa, Meksıka, Venesýela, Portýgalıa, Rýmynıa, Polsha, Ýkraına, Izraıl, Úndistan, Indonezıa, Reseı, Qazaqstan jáne basqa da elderdiń dızaınerleri qatysty.

Baıqaýǵa túsken jobalardyń basty talaby «Bolashaq energıasy» kórme taqyrybyna saı kelýi tıis. Sondaı-aq, qabyldaýshy el - Qazaqstan Respýblıkasy mádenıetiniń erekshelikterin aıǵaqtaýy qajet. Birinshi kezeń qorytyndysy boıynsha, 7 qatysýshynyń jumysy iriktep alyndy. Baıqaý sharttaryna saı, jeńimpazdar 2014 jylǵy tamyz aıynyń 4-18 aralyǵynda ótetin halyqtyq daýys berý arqyly anyqtalady. Kóp daýys jınaǵan úsh jobanyń ishinen bireýi jeńimpaz bolyp tabylady. qorytyndy 19 qyrkúıekte jarıalanady. Kez kelgen azamat Facebook, VKontakte, Twitter nemese Moı mır áleýmettik jelilerinde daýys bere alady. Nemese elektrondy poshta arqyly arnaıy kod alyp qana daýys berýge bolady.