Keler jyly Qazaqstanda ulttar men ulys ókilderiniń ádet-ǵurpy men birligin nasıhattaıtyn respýblıkalyq jańa telearna ashylady. Etnosaralyq telearna ashý ıdeıasyn Qazaqstandaǵy tatar-bashqurt qaýymdastyǵynyń ókildigi usyndy, - dep habarlady Tengrinews.kz.
Tatar-bashqurt qaýymdastyǵynyń atqarýshy dırektory Rınat Abdýlhalıkov: "Erterekte biz Qyrǵyzstan, Ózbekstan, Túrkıa men Armenıanyń telearnalaryn kóretinbiz. Sol ýaqyttarda ózge ulttardy tanýǵa múmkindigimiz bar edi. Jáne sol kezeń óte qyzyqty ótti biz úshin. Qazir kabeldi pakettegi BBC, CNN nemese Deutsche Welle sekildi telearnada kórsetilgen habarlar ǵalamdyq deńgeıde bolǵandyqtan, biz úshin ol múlde túsiniksizdeý bolyp tur”, - deıdi. Etnomádenı birlestikteriniń ókilderi biz bir-birimiz týraly tym az bilemiz, alaıda ár ultta óziniń Abaıy, óziniń Shoqan Ýalıhanovy bary anyq dep esepteıdi. Bul týraly Abdýlhalıkov sózin sabaqtap: "Qazaqstan kópultty memleket dep aıtamyz. Al efırlerde sol túrli ulttar men ulystar týraly kórsetilip jatyr ma? Telearna kestesinde ıvrıt, ýkraın, uıǵyr nemese nemis tilindegi habarlar bar ma? Sondyqtan biz nege Qazaqstandaǵy kópultty mádenıetti kórsetetin memlekettik telearna ashpaımyz. Ár ulttyń qazaq jerinde týǵan, ósip-óngen óz tulǵalary bar. Bir ǵana tatarlardyń ishinen Latıf Hamıdı, Gaınan Kýrmashev sekildi uly adamdar shyqqan. Elimizdiń ár túkpirinde mahabbattyń úlgisi bolyp tabylatyn Dýdaraıǵa ǵashyq bolǵan óz Marıa Rekınasy da bar",- degen.
Basylymnyń málimetinshe, "Birlik" telearnasy keler jyly Qazaqstan halqy Assambleıasynyń 20 jyldyǵy qarsańynda ashylmaq. Atalǵan ıdeıany Assambleıadaǵylar tolyqtaı qoldap otyr.
Qamshy-aqparat
