«Jalpy medısına jáne ǵylymı bıologıa mamandyqtaryn tańdaǵanmyn. Bálkim, mamandyq tańdaǵanda qatelesken bolarmyn. Biraq 93 balmen grantqa túse almaı qalǵanymda qatty soqqy aldym. Esimdi áli jıa almaı júrmin. Biraq ózim tanıtyn, 88 bal jınaǵan «Altyn belgi» ıegeri grant alyp ketti. Men tapsyrǵan mamandyqtyń orys tobyna tapsyrǵandar 81 balmen grant utyp aldy» deıdi Symbat.

125 BALMEN TEGİN OQÝǴA TÚSE ALMAÝ

Shyǵys qazaqstandyq Ásel Shahantaeva 93 balmen jýrnalısıka fakúltetine qazaq tobyna oqýǵa túse almaı qalǵan. Talapker «jýrnalısıka» mamandyǵynyń orys tobyna 83 bal jınaǵandar grant ıelengen kórgende qatty ókingenin aıtady.

Memlekettik oqý granty tizimindegi qazaq jáne orys tobyna túsken talapkerlerdiń upaı kórsetkishteri. 11 tamyz 2014 jyl.

Azattyq tilshisinen aty-jónin jarıalamaýdy ótingen almatylyq talapkerdiń sózinshe, ol 125 balmen grant ıelene almaǵan, óıtkeni ózi tańdaǵan tórt mamandyq boıynsha da (memlekettik basqarý, álemdik ekonomıka, halyqaralyq ekonomıkalyq qatynastar, qarjy) baıqaý tym kúshti bolyp, tek úzdik belgi ıeleriniń arasynda ótken. Talapker ata-anasynyń ózin endi shetelde oqytý múmkindigin qarastyryp jatqanyn aıtty.

Almatylyq Aslan Qaparjanov – «rejıssýra» mamandyǵy boıynsha 96 balmen grantqa ilige almaǵan talapker. Ol: «Orys tobyna tapsyrǵanymda osy jınaǵan upaıymmen grantqa ońaı túser edim. Orys tobyna túsken talapkerlerdiń eń joǵary kórsetkishi 84 bal bolyp tur» deıdi.

Bıylǵy memlekettik granttar tiziminde «murajaı isi» mamandyǵy boıynsha qazaq tobyna 77 upaı jınaǵandar eń sońǵy bolyp tizimge ilinip tursa, orys tobyna túskenderdiń eń joǵary nátıjesi 74 bal bolyp tur. Bul mamandyqqa 53 bal jınaǵandar orys tobyna grantqa túsip ketken.

«Metalýrgıa» mamandyǵy boıynsha qazaq tobyna 68 bal jınaǵandar túse almasa, orys tobyna 50 bal jınaǵandar grant utyp alǵan.

«GRANT BÓLÝ JÚIESİN ÓZGERTSİN!»

Bul jaıt ata-analar men ustazdardyń da narazylyǵyn týdyryp jatyr. Máselen, Óskemendegi mektepterdiń birinde qyzmet atqaratyn ustaz Salıma Aspanbekovanyń joǵary bal jınaǵan eki shákirti grant ala almaı qalǵan. Ol bilim mınıstrligi grant bólý júıesin ózgertý kerek dep sanaıdy.

Memlekettik oqý granty tizimindegi qazaq jáne orys tobyna túsken talapkerlerdiń upaı kórsetkishteri. 11 tamyz 2014 jyl.

«81 bal jınaǵan eki oqýshymyz qazaq tobyna «mehanıka» mamandyǵy boıynsha grantqa túse almaı qaldy. Esesine olar tapsyrǵan mamandyqtyń orys tobyna 51 balmen grantqa túsip ketkender bar. Bilim jáne ǵylym mınıstrligi grant bólý erejesin qaıta qarap, talapkerlerdi qazaq jáne orys toptary dep bólmeı konkýrsty birge uıymdastyrý kerek. Keıin oqýǵa túskennen keıin qazaq jáne orys tobyna bólgen jón» deıdi muǵalim.

Al 93 balmen qazaq tobyna grantqa túse almaǵan óskemendik Ásel Shahantaevanyń anasy Aıshanyń paıymdaýynsha, grant bólý erejesi kóp talapkerge tıimsiz.

«Jyl boıy daıyndalady. 93 bal alady da, qazaq tobyna grantqa túspeı qalady (aqyly oqýǵa túsýdiń ortasha kórsetkishi – 70 bal). Al orys tobyna 85 bal jınaǵandar grant utyp alady. Bul bilimdi baǵalaý dep aıta almaımyn. Amal joq endi qyzymyzdy aqyly túrde oqytamyz» deıdi ol.

Al granttardy bólýmen aınalysqan bilim jáne ǵylym mınıstrliginiń aty-jónin jarıalamaǵan ókili bul jaıtqa baılanysty Azattyqqa: «Konkýrs qazaq jáne orys toptarynyń arasynda jeke-jeke ótkiziledi. Al talapkerler qaı tilde oqýǵa qujat tapsyrsa da óz erikteri, esh shekteý joq» dep jaýap berdi.

Bıyl talapkerlerge 34 165 memlekettik grant bólingen. Onyń 2 530-y joǵary oqý oryndarynyń daıarlyq bólimderine, 31 635-i 1-kýrsyna túsýge berildi. Bıylǵy maýsym aıynda ótken UBT-ǵa 92 myńnan astam mektep bitirýshi qatysqan. Olardyń 63 myńnan astamy synaqty qazaq tilinde, 28 myńnan astamy orys tilinde tapsyrǵan edi.

"Azattyq radıosy"

(Áýelgi taqyryp: Joǵary balmen grantqa jetpegender narazy)