QazAqparattyń jazýynsha 25 tamyzdan bastap «Qazaqstan» ulttyq telearnasynan Shyńǵys hannyń nemeresi, Tóle hannyń uly - Mońǵoldardyń sońǵy uly hany jáne Qytaı ımperıasynyń negizin qalaýshy Qubylaı hannyń ómirin, basqarýy jáne ózge elderdi basyp alýlaryn sýretteıtin «Qubylaı han» epıkalyq dramasy kórsetilmek. Telehıkaıanyń sújeti birneshe on jyldyqty qamtıdy jáne mońǵoldardyń uly dınastıasy Iýannyń, odan keıin uly Qytaı ımperıasynyń qurylýyna sebep bolǵan oqıǵalar týraly baıandaıdy.
50 serıadan turatyn tarıhı drama Qytaı elinde úlken tabysqa jetip, qymbat jobalardyń biri boldy. Telehıkaıa Gonkong, Taıland, Malaızıa, Koreıa, Taıvan, Vetnam, AQSH, Kanada elderinde de kórsetildi. Telehıkaıanyń búdjeti 250 mln. AQSH dollaryn qurady. Týyndyda 5 myńǵa jýyq akter oınaıdy. Sondaı-aq, túsirilim jumystaryna 5 myńǵa jýyq at qatystyryldy. Tarıhı dramanyń qoıýshy rejısery - Sýı Sıý Mın.
Móńke mońǵoldardyń hany atanǵan kezde Qubylaı han Qytaıdy jaýlap alýǵa bel býady. Shyńǵysqannyń óliminen keıin onyń Tóle jáne Úgedeı atty uldary bılikke talasa bastaıdy. Úgedeı han bolǵanymen onyń áıeli Tóregin ýaıymnan kóz ashpaıdy, sebebi Uly Shyńǵysqan kózi tirisinde nemereleriniń ishinde Tóleniń uly Qubylaıdy erekshe jaqsy kóretin. Tóregin kúıeýiniń aǵasyna ý berip óltirgenimen qoımaı, ákesiniń ólimi úshin kek alǵysy kelgen Móńke men Qubylaıdy kóterilis uıymdastyrdy dep aıyptaıdy. Alaıda, Qubylaıdyń erekshe qyraǵylyǵy men anasy Sorgegtenıdiń danyshpandyǵynyń arqasynda Tóle urpaqtary aman qalady. Qubylaı Shyńǵysqannan keıingi mońǵoldardyń besinshi jáne sońǵy ataqty ımperatory atanady....
Qubylaı basyp alǵan jerge ıelik etý úshin bir top senimdi Qytaıdyń konfýsıshil keńesshilerin óz qaramaǵynda ustaıtyn bolǵan. Ol kóptegen Qytaı ǵalymdaryna jaı ǵana jumys berip qoımaı, olarmen dos bola bilgen, sondaı-aq Qytaıdyń ortalyq jazyǵyn basqarý úshin memlekettik qyzmet júıesin de qabyldady. Sondyqtan da ony sesen han, ıaǵnı danyshpan han dep ataǵan.
Ózi bılik etip turǵan kezde Qubylaı Qytaıda keńinen tanymal bolǵan. Alaıda, mońǵol konservatorlary onyń qytaı mádenıetine degen qyzyǵýshylyǵyna narazy bolatyn. Keıbir jalaqorlar onyń aǵasy Móńkege Qubylaı týraly: «Qubylaı kóptegen qytaılyqtardyń júregin jaýlap, Mońǵol ımperıasyna qaýip týdyryp, mol baılyqqa kenelgen» degen alyp qashpa áńgimeler aıta bastaıdy. Sol úshin telehıkaıada áýlettiń ishindegi úlken janjal bastaý alyp, aǵaıyndy eki baýyr arasynda talas bastalady. Alaıda, aqyl jeńip, aǵaıyndylardyń basy qaıta birigedi. Nátıjesinde, dana basshy Qubylaıhan barlyq Qytaıdy qol astyna biriktirip, qazirgi Beıjiń ornynda astanasyn jarıalap, kórshi patshalyqtardy da ózine baǵyndyrady.
Telehıkaıada dál osy tusta ákesiniń ornyn basýǵa talpynyp, búlikshilerdi basqarǵan Qubylaı hannyń ulyna qarsy kúreske Venesıadan jas Marko Polo kelgen kez jaıly, batys pen shyǵys arasyndaǵy alǵashqy qatynastardyń qalyptasýy týraly baıandaıdy. Marko Polo keıinnen Iýán ımperıasynyń ómiriniń sıpattamasyn qaldyrǵan. Marko Polonyń baıandaýynyń áserinen Qubylaıhan batystaǵy erekshe tanymal tarıhı tulǵaǵa aınalyp, onyń aty jańadan tanyla bastady.
Dramalyq oqıǵalarǵa, saraı ishindegi zulym nıettilerge, taq pen jańa jerlerge ıelik etý úshin keskilesken urys pen tartysqa toly kóp serıalyq álemdik bestsellerdiń Qazaqstandaǵy premerasy «Qazaqstan» ulttyq telearnasynda saǵat 19:30-da dúısenbi men juma aralyǵynda orys tilindegi sýbtıtrmen kórsetiledi.
Qamshy-aqparat
