QR Prezıdenti Nursultan Nazarbaev resmı málimdeme jasady.  Onda elbasy halyqqa jyl saıynǵy joldaýynyń erteń,  31 qańtarda  BAQ jarıalanatynyn jetkizdi. Bıylǵy joldaýynda el damýynda tyń qarqyn beretin jańa baǵdardy usynady. Basty taqyryp "Qazaqstannyń úshinshi jańǵyrýy" dep atalady. Ol elimizdiń ekonomıkalyq damýynyń ınovasıalyq ózegine negizdelgen.  

"Biz sandyq tehnologıaǵa negizdelgen bolashaǵy zor baǵyttarǵa mán beretin bolamyz. Al bilim berý, densaýlyq saqtaý, halyqty áleýmettik qorǵaý sekildi mańyzdy suraqtar qashan da nazarda bolady. Qazaqstan qysqa merzim ishinde kemeldenip, qýaty tolysqan saqa memleketke aınaldy.  Shırek ǵasyrda  elimizdi túbegeıli ózgertken eki jańǵyrýdy iske asyrdyq. Aldymen naryqtyq ekonomıka qaǵıdalaryna negizdelgen múldem jańa sıpatty memleket qurdyq. Ekinshiden, "Qazaqstan-2030" strategıasyn júzege asyryp, asqaq Astanany qurdyq. Endi kezekti mańyzdy belestiń aldynda turmyz" dedi Nursultan Nazarbaev.

Memleket basshysynyń resmı málimdemesi memlekettik telearanalarda kórsetildi.