Pavlodar oblysyndaǵy balabaqshalardyń barlyǵyn memlekettik tilde bilim men tárbıege kóshirýdi qolǵa alý. Osyndaı usynysty aımaq basshysy Bolat Baqaýov oblystyń ıdeologıalyq aktıviniń otyrysy barysynda jasady, dep habarlaıdy Baq.kz agenttigi.
Jıyn barysynda Memleket basshysy Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Joldaýynyń basymdyqtary talqylandy.
«Adamı kapıtaldyń damýy - ekonomıkalyq ósimniń negizgi faktory. Onyń ishinde bilim berý, densaýlyq saqtaý, áleýmettik qamtamasyz etý salalaryna basa nazar aýdarylyp otyr. Elbasymyz, eń aldymen, bilim berý júıesiniń rólin ózgertýdi atap ótti. Bul baǵytta oqýshylardyń óz betimen izdený qabiletterin arttyryp, IT bilimdi, qarjylyq saýattylyqty, ultjandylyqty damytý boıynsha jumys jasaý qajettigin atap ótti. Sondaı-aq, úsh tilde oqytýdy kezeń-kezeńimen júzege asyrý boıynsha usynystar daıyndaýdy tapsyrdy», - dep atap ótti Bolat Baqaýov.
Aımaq basshysy úsh tilde oqytý júıesi Ertis óńirinde júıeli túrde, birtindep jalǵasatynyn jetkizip, bul baǵyttaǵy jumysty balabaqsha qabyrǵasynan bastaý qajettiligin tilge tıek etti.
«Jeti túrli ilim bil, jeti jurttyń tilin bil» degen qazaqtyń maqaly bar. Sondyqtan, álemdik deńgeıdegi aǵylshyn tilindegi qarym-qatynas - elimizdiń jaǵdaıyn jaqsartýǵa jumys jasaý kerek. Al qazaq tiliniń basymdyǵy saqtalyp, onyń damýy boıynsha naqty sharalar júzege asatyn bolady. Men, Pavlodar óńirindegi balabaqshalardy memlekettik tilge kóshirýdi qolǵa alý týraly usynysty oblystyń bilim berý basqarmasyna jan-jaqty qarastyrýdy tapsyrǵan edim. Al keıin mektepke bergende, ata-analar ózderi tańdaý jasaıtyn bolady. Bul óz kezeginde, mektep jasyna deıingi balalarǵa memlekettik tildi úırenýge múmkindik beredi. Al orys, aǵylshyn tilderin árbir oqýshy mektep jasynda, kez kelgen ýaqytta ıgerip alady», - deıdi oblys ákimi.
Aıta keteıik, Táýelsizdik jyldary ishinde oblysta 93 mektepke deıingi bilim berý uıymy qaıta qalpyna keltirilip salyndy, 261 mektepke deıingi shaǵyn ortalyq ashyldy. Qazirgi tańda óńirde 168 balabaqsha jumys isteıdi. 3-6 jas aralyǵyndaǵy balǵyndardyń barlyǵy mektepke deıingi bilimmen tolyq qamtylǵan.
