Qytaı BAQ-tarynda jerlesimiz qatysyp jatqan Hý Nan telearnasyndaǵy «Men ánshimin» baıqaýynyń úshinshi aptasynyń nátıjesi týraly aqparattar paıda boldy dep habarlaıdy «Qamshy» portaly.

Taraǵan aqparatqa saı, otandasymyz Dımash Qudaıbergen  «The Show Must Go On» ándi altynshy bolyp aıtyp, baıqaýdyń aptalyq nátıjesinde úshinshi oryn alǵan.

Qytaıda «I’m singer» jobasyna qatysyp jatqan Dımash buǵan deıingi alǵashqy eki aptada da birinshi bolǵan bolatyn. Onyń tanymaldyǵy aıaqasty artyp, áleýmettik jelidegi jazylýshylary kúrt kóbeıgen. Sondaı-aq, qytaılar Dımash kıgen kıim úlgilerin, Dımash beınelengen zattardy tanymal saýda saıttary arqyly sata bastaǵan.

Aıta keter bolsaq, Dımash ekinshi aptadaǵy jeńisinen keıin Almatyǵa ushyp kelip, Elbasynyń ózi qatysqan Ýnıversıadanyń ashylý saltanatynda óner kórsetti.

Sonymen qatar, oǵan baıqaýdyń ekinshi aptasynda jeńis syılaǵan «Opera 2» ánin Vıtas daýlap, Qytaıda advokattar alqasyna shaǵymdanyp úlgerdi.

Oqyrmannyń esine sala keter bolsaq, «Men ánshimin» jobasynyń úshinshi aptasynyń kórsetilimi erteń, senbi kúni Beıjiń ýaqytymen túngi on bir shamasynda baıqaýdy ótkizýshi telearnanyń efırinen kórsetiledi.

Taralǵan aqparat rasqa aınalyp, Dımash baıqaýdyń úshinshi aptasynda birinshi oryn ala almasa da, bul otandasymyz úshin jeńilis emes. Alda áli 11 aptaǵa jalǵasqan taıtalas baıqaý tur. Osyǵan oraı «Qamshy» portaly óz oqyrmandaryn otandasymyz Dımashty qoldaýǵa shaqyrady.