Atyraý oblystyq sotynda Manarbek Ýteýovtiń hatyna qatysty tórt eks-polıseıdiń apelásıalyq shaǵymy qaraldy. Polısıa mekemeleriniń burynǵy jedel ýákilderi Azamat Dostanov, İlıas Stamǵalıev, eks-tergeýshi Ernar İzdibaev jáne aǵa anyqtaýshy Nurjan Orazǵalıev «ókinip», amnıstıaǵa iligýge ótinish surady, dep habarlaıdy «Aq jaıyq» gazeti.

Sottalýshylardyń ózderin sot prosesine ákelmedi. Advokattar sot ústinde óz qorǵalýshylarynyń áli jas ekenin, qyzmet oryndaryndaǵy olarǵa qatysty oń pikirlerdi jáne otbasyndaǵy jaısyz jaǵdaılardy eskerýin surady. Máselen, İlıas Stamǵalıevtiń kámelet jasqa tolmaǵan eki balasy bar, al Nurjan Orazǵalıev – óz otbasynda jalǵyz bala eken.

Atyraý oblystyq sotynyń qylmystyq ister jónindegi alqasy tórt sottalýshynyń bas bostandyǵynan aıyrý jazasyn bas bostandyǵyn shekteý jazasyna ózgertti. Qaýly jarıalanǵan kúnnen bastap kúshine endi.

Eske sala keteıik, 2016 jyldyń 28 jeltoqsanynda eks-polıseılerdi 3 jylǵa bas bostandyǵynan aıyrǵan bolatyn. Olardy "dáleldi qoldan jasaý", "kinásiz adamdy kópe-kórineý qylmystyq jaýapqa tartý", "qyzmet babyn asyra paıdalaný" jáne "qyzmet babynda jalǵan qujat jasaý" baptary boıynsha aıypty dep tapqan.

Polısıa qyzmetkerleri burynǵy polıseı, jergilikti turǵyn Dmıtrıı Kımdi urlap áketip, óltirdi degen aıyptarmen sottalǵan Manarbek Óteýovtiń "ókiný hatynan" soń ustalǵan.

Óteýov hatynda burynǵy basshylyǵyn óziniń qylmysyna jáne basqa da qylmystarǵa qatysy baryn aıtyp, Atyraý polısıasynyń joǵary shendi birneshe sheneýniginiń atyn ataǵan. Ótken jyly mamyr aıynda sot ony 22 jylǵa sottaǵan.