AQSH-ta 100-den asa jumysshy «Imıgranttarsyz ótken bir kún» atty aksıa ótkizip, sol úshin jumystan qýyldy dep habarlaıdy bbc.com.

Aksıany uıymdastyrýshylar ımıgranttardy bir kún úıinde qalyp, jumysqa shyqpaı, dúken, kafelerge barmaı, balalaryn da mektepke jibermeýge shaqyrdy. Onyń maqsaty AQSH úshin ımıgranttardyń mańyzdylyǵyn túsindirý.

Djım Serovskıı Kommers-Sıtıde JVS Masonry qurylys kompanıasynyń negizin qalaǵan kásipker. Ol Sı-en-en-ge bergen suhbatynda jumysqa kelmegen prorab pen  30-ǵa jýyq tas qalaýshyny eshbir ókinishsiz jumystan shyǵaryp tastaǵanyn aıtqan.

Serovskıı aldyn-ala jumysqa shyqpaǵany úshin jumystan shyǵaratynyn eskertken.

Talsa qalasynda 12 adam jumystan shyǵyp qalǵan. Bular AQSH-qa Latyn Amerıkasynan kelgen jergilikti meıramhanalarda jumys isteıtinder.

Tennesıdegi Nolensvıllde ǵımaratty syrlaýmen aınalysatyn 18-ge jýyq adam jumystan shyǵyp qaldy.

Aksıa ótken kúni AQSH-tyń kóptegen iri qalalarynda ondaǵan dúkender, kafe, meıramhanalar ashylmaǵan. Tipti Vashıngtondaǵy birneshe kofeınálar jumys istemegen.  

Kóptegen kásip ıeleri ásirese AQSH-tan tys aımaqta týylǵandar óz qyzmetkerlerine jumysqa shyqpaýyna ruqsat bergen.

Aksıaǵa qatysýshylar Donald Tramptyń qańtar aıynda ımıgranttar týraly buıryǵyna óz qarsylyqtaryn bildirdi. Bul qujat arqyly AQSH prezıdenti 7 musylman elderiniń azamattaryna elge kirýin shektegen.

Sıetldegi Federaldy sot (Vashıngton) buıryqty toqtata  turǵan. Ádilet Mınıstrligi bul sheshimdi ózgertýge tyrysýda.

Ótken aptada Tramp pres-konferensıada ımıgranttardyń elge kirýin shekteıtin jańa buıryqqa qol qoıatynyn aıtqan. Assoshııeted prestiń málimetinshe, onda Aq úıdiń Iran, Irak, Sırıa, Iemen, Somalı, Sýdan jáne Lıvıa elderiniń azamattaryn AQSH-qa kirýine shekteý qoıatyny jazylǵan.