Búgin Astanada bir top belsendi Qazaqstan prezıdenti Nursultan Nazarbaevqa energetıka mınıstri Vladımır Shkolnıkti qyzmetinen bosatýdy talap etip, hat joldady. Bul týraly «Azattyq radıosy» habarlady.
Atalǵan saıttyń habarlaýynsha, hat avtorlary Nazarbaevtan Qazaqstanda atom elektr stansıasyn salýǵa moratorıı jarıalaýdy, Baıqońyr ǵarysh aılaǵynan geptıl otynyn paıdalanatyn «Proton» zymyrandaryn ushyrýdy toqtatýdy, «basqa memleketterdi Qazaqstannyń ishki isine aralastyrmaýdy» jáne «ózge memlekettiń múddesine jumys isteıtin adamdardy basshylyq qyzmetke qoımaýdy» talap etken. Arasynda «Antıgeptıl» qozǵalysynyń músheleri bar onnan asa adam prezıdenttiń atyna jazylǵan hatty Aqorda aldyndaǵy hatqa arnalǵan jáshikke salǵan soń taraǵan.
Esterińizde bolsa, 6 tamyzdaǵy úkimettiń keńeıtilgen otyrysynda mınıstrlikter qysqartylyp, qaıta jasaqtaldy. Osy qaıta qurylymdaýda 2009 jyldan «QazAtomÓnerkásiptiń» tizginin ustap kele jatqan, Máskeýde týylǵan Vladımır Shkolnık Qazaqstannyń energetıka mınıstri bolyp taǵaıyndalǵan edi. Osydan keıin onyń saıası qadamdaryn Qazaqstanǵa tıimsiz sanaıtyn bir top ultshyldar atalǵan shendini qyzmetten alý týrly bılikke málimdeme jazǵan bolatyn. Kóp qazaq tildi saıttarmen birge biz de bul hatty jarıalaǵanbyz. Ultshyldar Shkolnıkti Reseı múddesine jumys isteıdi dep sanaıdy.
Al, buǵan deıin, 2012 jyly Forbes Kazakhstan basylymy Qazaqstannyń eń baı 50 adamynyń tizimin jarıalaǵanda, onyń ishinde joǵaryda aty atalǵan shendiniń balasynyń esimi de bar edi. Tizimde 40 orynda bolǵan, Igor Shkolnık $101 mln qarjynyń ıesi eken. Ol qazir bar bolǵany 33-aq jasta.
“Qamshy” silteıdi
