Qazaqstandyq depýtattar Reseıdiń LDPR jetekshisi, depýtat Vladımır Jırınovskııdiń arandatýshy málimdemelerin nazardan tys qaldyrmaýy kerek dep esepteıdi, - dep habarlady Tengrinews.kz.
"Jırınovskııdiń sypaıylyqtyń ǵana emes, memlekettik saıasattyń da aıasynan shyǵyp ketetin sońǵy málimdemesine qandaı da bir áreket bolýy kerek dep oılaımyn. Ol tarazylanǵan, salmaqty bolýy kerek jáne "óziń aqymaq" degen dárejede bolmaýy tıis", - dep "Aq jol" partıasy fraksıasynyń jetekshisi Azat Perýashev Parlamenttiń jańa sesıasynyń ashylýynan soń óz pikirin bildirgen. Jırınovskıı sıaqty saıası fıgýranyń "sýǵa salsa batpaıtyndyǵynyń" sebebin Perýashev bylaı túsindiredi: "Ne Jırınovskıı óz janynan qosyp aıtady nemese bul sanaly arandatý". "Onyń málimdemesine qarańyz: "Biz Ýkraına máselesin talqylap alaıyq, sodan keıin Qazaqstandy qolǵa alamyz. Bul - tikeleı arandatý jáne ol qarapaıym adamnyń emes, Memlekettik dýma depýtatynyń aýzynan shyǵyp otyr. Sondyqtan bizge mundaı jaıttarǵa áreket qylyp, oǵan der kezinde saıası baǵasyn berý qajet”. Depýtattyń aıtýynsha, bul - Reseıdiń memlekettik erki ne Reseı memlekettik saıasatynyń jelisi emes, bul - Reseı prezıdenti Vladımır Pýtın júrgizip otyrǵan saıasatqa qysym kórsetý áreketi.
Jırınovskııdiń málimdemelerin nazardan tys qaldyrmaý kerektigin "Halyqtyq komýnıser" fraksıasynyń depýtaty Tursynbek Ómirzaqov ta qoldaǵan. "Jırınovskıı memlekette joǵary laýazymda otyryp jaýapsyz málimdemeler jasaıdy, ol sol úshin tıisti jaýapkershilikke tartylýy tıis. Biz onyń kóptegen aqymaq málimdeme jasaıtynyn kórip otyrmyz. Biz ony "persona non-grata" dep tanımyz jáne ony bizge kirgizbeımiz. Men oǵan qandaı da bir qoǵamdyq aıyptaý bolýy kerek dep oılaımyn. Ondaı málimdemelerdiń jolyn kesip, sol elge nemese onyń úkimetine tıisti nota tapsyrý qajet. Keleside mundaı qadamǵa barmaý kerektigin bilýi úshin, óz odaqtastaryna qarsy aqymaq málimdemeler jasamaýy úshin ondaı málimdemelerge mindetti túrde tıisti deńgeıde áreket etý kerek", - degen Ómirzaqov óz sózinde.
Burynǵy senator Ǵanı Qasymov ta mundaı arandatýlarǵa tıisti deńgeıde jaýap berý qajet dep óz pikirin bildirdi: "Onyń Qazaqstanǵa qatysty ekstremıstik málimdemesi de bar. Biz oǵan toıtarys bermeı, "onyń deni durys emes adam" dep jatamyz. Eger esi durys emes adam saıası áreketterge jaýapty bolsa, ol eldiń saıası júıesine aralasatyn bolsa, ol bıliktiń ókili bolsa she? Mine, áńgime qaıda jatyr. Qoǵamda shıelenisti boldyrmaý úshin biz kásibı, saıası deńgeıde laıyqty baǵa bere alýymyz, oǵan áreket ete alýymyz qajet", - deıdi Qasymov. Ol sondaı-aq Reseı prezıdentiniń qazaq memlekettiligi týraly pikirine qatysty da oılaryn aıtty: "Qazaqstannyń memlekettiligi, qazaq memlekettiligi jalpy álemge belgili, ol - bizdiń tutas tarıhı dáýirimiz, ol - barlyq tarıhı eskertkishterge jazylǵan tereń tamyrymyz, ol tarıhtyń barlyq qabatynda moıyndalǵan, ony álem elderi tarıhshylary bekitken. Sondyqtan Qazaqstan keńistiginde bolǵan memlekettik qurylymdardy joqqa shyǵarý, oǵan kúmán keltirý aqylǵa syımaıdy jáne joǵary deńgeıdegi saıasatkerler úshin kúlkili jaıt", - deıdi Qasymov.
Qamshy-aqparat
