"Qamshy" portaly kúni keshe ǵana Arman Sqabylulynyń shý týdyrǵan materıalyn oqyrman nazaryna usynǵan saıttardyń biri. "Biraz oqyrmanym jekege jazyp, jýrnalıs Arman Sqabylulynyń "NUR.KZ" portalyna bergen búgingi suhbatyna baılanysty oı-pikirimdi surapty" dep óziniń feısbýk paraqshasynda jazba qaldyrǵan tanymal telejýrnalıst Serik Abas-shahtyń pikirin jarıalamasaq oqyrman bizdi keshirmes.
"1.Arman - jaqyn dosym, kýrstasym. Biraq, ol táýelsiz jýrnalıs. Onyń da ózindik ustanymy bar. Suxbatta aıtylǵan jáıtter óz aramyzda onsyz da jıi talqylanyp júrgen-di. Jıi daýlasatynymyzdy jasyrmaımyn. Sondyqtan, problemalardy el aldyna jaıyp salǵan búgingi áńgimesine onsha tańdanbadym. Biraq, atalmysh jazbanyń elge tanymal saıtta jarıa kórgenine azdap qynjylatynymdy jasyrmaımyn. Buryn "qoı-qoıǵa qoıa salatyn" dosymnyń "ashýyna tıgen bir sebep bar, áıteýir (óz aıtýynsha). Qalaı bolǵanda da, Arekeńniń ashshylaý aıtqan syn-pikirin, áriptes dosymnyń janashyrlyq nazy dep qabyldaımyn.
3. Jumys aýqymy óte úlken mekemege Erlan Qarın myrzanyń tóraǵa bolyp kelgenine kóp ýaqyt bolǵan joq. Erekeń kele salysymen aq, korporasıadaǵy barlyq kemshilik joıylyp, jumystyń bári túzele qalady dep bosqa úmittenbeńiz. Az ýaqyt ishinde, Qarın túgil Máskeýlik telebesaspap Kostá Ernestiń ózi de tóńkeris jasaı almasy anyq. Bul uzaq ári aýqymdy proses.
3.Erlan Qarın ózimen birge Ulttyq arnaǵa da, "Balapanǵa" da, "KAZsport-qa" da jańa komanda alyp kelgen joq (búginge deıin osylaı, áıteýir). Teleónim ıeleriniń bári derlik - osy qara shańyraqtyń astynda qyzmet istep júrgen jastar. Aýtsorsıngtik stýdıalarǵa tapsyrys berý jumystary endi ǵana bastalýda. Sondyqtan, jańa tóraǵa bilek sybana iske kirisse de, "qazaqstandyqtardyń" shabyty sharyqtap, "shedevr teleónimder konveıeri" iske qosylyp ketpedi. Jańa basshymyzdyń uly ózgeris jasaı salatyn sıqyrshylyǵy joq. Aınaldyrǵan otyz bes kún ishinde reforma jasap úlgermeısiz.
4."Qazaqstan" korporasıasy jer betinen qashyqta ushyp júrgen bólek ǵalamshar emes. Bul da osy qoǵamnyń bir bólshegi ekenin umytpaıyq. Munda da "kún" bar, munda da "kóleńke" bar. Munda da "kókeshkiler" qońyraýy jıi estilip turady. Munda da maıtalman mamandardyń tapshylyǵy aıqyn seziledi. Problemalardyń bárin eden betindegi shań-tozań sıaqty tez sypyryp tastaı almaısyz. Jańa basshylyqqa azdap bolsa da ýaqyt berińizder. Ózgeris jasaýǵa bári múddeli"
