Amerıkalyq rejıser Brendon Lı Batys Mońǵolıadaǵy qazaqtardyń ómiri týraly vıdeorolık túsirdi. «Mońǵolıa kóshpelileri» atty qysqa metrajdy rolık National Geographic AQSH-tyń ulttyq geografıalyq qoǵamdastyǵynyń Iýtýbtaǵy arnasynda jarıalandy, dep habarlaıdy QazAqparat

Lı zamanaýı kóshpendilerdiń turmys-tirshiligin, dástúrli oıyndaryn, ańshylyǵyn, qysqa daıyndyǵyn kórsetti. «Men Mońǵolıadaǵy túsirilimdi umytpaımyn - bul óte keremet ári qıyn túsirilim boldy. Kúnniń qatty sýytýy qıyndyq týdyrdy. Jasaǵan vıdeorolıgimizde túrli-tústi túzetýlerdi qoldanǵandyqtan kún jyly sıaqty kórinedi. Biraq aýa temperatýrasy nólden tómen edi. Túsirilim kezinde qol-aıaqtarym tońǵannan qımylǵa kelmeı qaldy», - dedi ol Look.tm basylymyna bergen suhbatynda.

«Sýyqtan bólekten, azyq-túlik jaǵy da qınady - kóshpeli qazaqtar pisken etten basqa kóp eshteńe jemeıdi eken. Men ádette balyq pen kókónisterdi kóp jeımin, al mundaı kúnde et jeýge týra keldi. Etti shaınap, jutýǵa ózimdi májbúrledim. Teńiz ónimderin kóretin kúndi asyǵa kúttim», - dep atap ótti Lı.

Onyń aıtýynsha, Mońǵolıa qazaqtary - qonaqjaı halyq. «Mońǵolıadaǵy kóshpeliler qalaı ómir súredi? Kún saıyn - aýyr eńbek. Olar únemi jumys jasap, qımyl-qozǵalysta bolady. Óte kóp mólsherde et jeıdi. Saıystar uıymdastyrady - oǵan mashyqtanbaı, shynyqpaı qatysý múmkin emes. Ójettilik qajet. Olardyń shydamdylyǵy meni qaıran qaldyrdy.  Búrkitshi-ańshylar kúni boıy er-toqymnyń ústinen túspeı, saǵattap sýyqta otyryp, qoıan nemese túlkini ańdıdy. Olardyń balalary da sondaı.  Kámeletke tolmaǵandardyń ózi attyń qulaǵynda oınaıdy», - dep atap ótti rejıser.

«Kóshpeliler, árıne, zamanaýı tehnıkalardy qoldanady. Olardyń kóbinde teledıdarlar men uıaly telefondar bar. Olar kıiz úılerin júk kólikterimen kóshiredi. Biraq, buǵan qaramastan, ol jaqta ózińdi 19-ǵasyrǵa oralǵandaı sezinesiń», - dep túıindedi Brendon Lı.